ab kya milen hasinon se hum gosha-gir hain

ab kyā mileñ hasīnoñ se ham gosha-gīr haiñ

ġhārat-garoñ ne luuT liyā hai faqīr haiñ

ḳhāliq bachā.e zohra-jabīnoñ kī chaah se

sunte haiñ do farishte abhī tak asiir haiñ

chaar āñkheñ ham ne kī to haiñ ġhussa na kījiye

saa.il nahīñ faqīr nahīñ rāhgīr haiñ

dar par tumhāre baiThe haiñ sar par hai āftāb

ham ḳhāksār mālik-e-tāj-o-sarīr haiñ

vo bhī to ro.eñ ai asar-e-giryā ek din

jin kī nigāh meñ mire aañsū haqīr haiñ

kah deñge saaf saaf vo dekheñ to aa.ina

ye maañg hai lakīr ham is par faqīr haiñ

nazroñ se kyā girā.eñge 'tāhir' adū mujhe

fazl-e-ḳhudā se dast-e-ḳhudā dast-gīr haiñ

ab kya milen hasinon se hum gosha-gir hain

ghaarat-garon ne luT liya hai faqir hain

KHaliq bachae zohra-jabinon ki chah se

sunte hain do farishte abhi tak asir hain

chaar aankhen hum ne ki to hain ghussa na kijiye

sail nahin faqir nahin rahgir hain

dar par tumhaare baiThe hain sar par hai aaftab

hum KHaksar malik-e-taj-o-sarir hain

wo bhi to roen ai asar-e-girya ek din

jin ki nigah mein mere aansu haqir hain

kah denge saf saf wo dekhen to aaina

ye mang hai lakir hum is par faqir hain

nazron se kya giraenge 'tahir' adu mujhe

fazl-e-KHuda se dast-e-KHuda dast-gir hain