ab lauT ke wapas mujhe jaana bhi nahin hai

ab lauT ke vāpas mujhe jaanā bhī nahīñ hai

vo ruuTh gayā hai to manānā bhī nahīñ hai

sach hai ki nigāhoñ se girānā bhī nahīñ hai

palkoñ pe magar us ko biThānā bhī nahīñ hai

dāman pe koī daaġh lagānā bhī nahīñ hai

dāman ko gunāhoñ se bachānā bhī nahīñ hai

ġhairat kī koī kis tarah ummīd rakhe ab

sab jānte haiñ ab vo zamāna bhī nahīñ hai

ta.amīl kisī hukm kī hargiz na kareñge

aur pesh-e-sitam sar ko jhukānā bhī nahīñ hai

ik baar chalā jaa.e jo dāman ko chhuḌā kar

bhūle se kabhī us ko bulānā bhī nahīñ hai

barsāt ne ye hukm havāoñ ko diyā thā

hai aag jahāñ par vahāñ jaanā bhī nahīñ hai

par aañkh se Tapkā.eñ lahū kis liye 'shātir'

jab ahd-e-vafā ham ko nibhānā bhī nahīñ hai

ab lauT ke wapas mujhe jaana bhi nahin hai

wo ruTh gaya hai to manana bhi nahin hai

sach hai ki nigahon se girana bhi nahin hai

palkon pe magar us ko biThana bhi nahin hai

daman pe koi dagh lagana bhi nahin hai

daman ko gunahon se bachana bhi nahin hai

ghairat ki koi kis tarah ummid rakhe ab

sab jaante hain ab wo zamana bhi nahin hai

tamil kisi hukm ki hargiz na karenge

aur pesh-e-sitam sar ko jhukana bhi nahin hai

ek bar chala jae jo daman ko chhuDa kar

bhule se kabhi us ko bulana bhi nahin hai

barsat ne ye hukm hawaon ko diya tha

hai aag jahan par wahan jaana bhi nahin hai

par aankh se Tapkaen lahu kis liye 'shatir'

jab ahd-e-wafa hum ko nibhana bhi nahin hai