ab mere liye aankh teri nam hai mujhe kya

ab mere liye aañkh terī nam hai mujhe kyā

ab tark-e-marāsim kā tujhe ġham hai mujhe kyā

is shahr-e-nigārāñ meñ sar-e-shām abhī tak

phūloñ se mahaktā huā mausam hai mujhe kyā

raushan thā jo barsoñ se diyā merī vafā kā

ab tere shabistāñ meñ vo maddham hai mujhe kyā

phir tere laboñ par hai vahī rang hinā kā

shāne pe tire zulf bhī barham hai mujhe kyā

ye fasl-e-bahārāñ ye junūñ-ḳhezī-e-mausam

ab dil meñ tirā ġham bhī bahut kam hai mujhe kyā

ik dasht-e-tahayyur kā samāñ hai mire aage

manzil kā nishāñ aaj bhī mub.ham hai mujhe kyā

maiñ Dhaltī huī dhuup meñ saa.e kī tarah huuñ

tū nik.hat-e-gul husn-e-mujassam hai mujhe kyā

ab mere liye aankh teri nam hai mujhe kya

ab tark-e-marasim ka tujhe gham hai mujhe kya

is shahr-e-nigaran mein sar-e-sham abhi tak

phulon se mahakta hua mausam hai mujhe kya

raushan tha jo barson se diya meri wafa ka

ab tere shabistan mein wo maddham hai mujhe kya

phir tere labon par hai wahi rang hina ka

shane pe tere zulf bhi barham hai mujhe kya

ye fasl-e-bahaaran ye junun-KHezi-e-mausam

ab dil mein tera gham bhi bahut kam hai mujhe kya

ek dasht-e-tahayyur ka saman hai mere aage

manzil ka nishan aaj bhi mubham hai mujhe kya

main Dhalti hui dhup mein sae ki tarah hun

tu nikhat-e-gul husn-e-mujassam hai mujhe kya