ab na sochenge ki is dahr mein insan hain bahut

ab na socheñge ki is dahr meñ insāñ haiñ bahut

ham to mamnūn tire gardish-e-daurāñ haiñ bahut

ġham hai me’yār-e-junūñ shauq ke sāmāñ haiñ bahut

chāk-e-dāman haiñ bahut chāk-e-garebāñ haiñ bahut

dil dhaḌaktā hai to āvāz sī aa jaatī hai

vāqa’ī aap to nazdīk-e-rag-e-jāñ haiñ bahut

mujh ko aatā nahīñ mahrūm-e-tamannā honā

dil salāmat hai to dil meñ abhī armāñ haiñ bahut

zindagī ġham ke añdheroñ meñ ghuTī jaatī hai

raat hai ek magar ḳhvāb-e-pareshāñ haiñ bahut

māne’-e-fitrat-e-āzād chaman hai na qafas

hausla chāhiye parvāz ke imkāñ haiñ bahut

jazb-e-tā'mīr to mahdūd-e-gulistāñ hī nahīñ

gul khilāne haiñ to vīrān bayābāñ haiñ bahut

zinda rahnā bhī hai fan jaan kā denā bhī hai fan

varna yuuñ zindagī-o-maut ke unvāñ haiñ bahut

zindagī kā koī ġham ab nahīñ hotā mahsūs

dil-e-'qāsim' pe tire dard ke ehsāñ haiñ bahut

ab na sochenge ki is dahr mein insan hain bahut

hum to mamnun tere gardish-e-dauran hain bahut

gham hai me’yar-e-junun shauq ke saman hain bahut

chaak-e-daman hain bahut chaak-e-gareban hain bahut

dil dhaDakta hai to aawaz si aa jati hai

waqa’i aap to nazdik-e-rag-e-jaan hain bahut

mujh ko aata nahin mahrum-e-tamanna hona

dil salamat hai to dil mein abhi arman hain bahut

zindagi gham ke andheron mein ghuTi jati hai

raat hai ek magar KHwab-e-pareshan hain bahut

mane’-e-fitrat-e-azad chaman hai na qafas

hausla chahiye parwaz ke imkan hain bahut

jazb-e-ta'mir to mahdud-e-gulistan hi nahin

gul khilane hain to viran bayaban hain bahut

zinda rahna bhi hai fan jaan ka dena bhi hai fan

warna yun zindagi-o-maut ke unwan hain bahut

zindagi ka koi gham ab nahin hota mahsus

dil-e-'qasim' pe tere dard ke ehsan hain bahut