ab na wo lazzat-e-udasi hai

ab na vo lazzat-e-udāsī hai

ab hamārā firāq baasī hai

tere baare meñ pūchhtā huuñ jise

hichkichāhaT use zarā sī hai

vo hai hāsil mire gunāhoñ kā

us kī lā'nat kisī du'ā sī hai

aap kā hai ye imtihān-e-hayā

bas hamārī to be-libāsī hai

toḌne ko kahā hai 'ahd-e-vafā

bevafā.ī meñ bhī vafā sī hai

maiñ na jānūñ mirī zabāñ hai kyā

is meñ ḳhushbū to reḳhta sī hai

yuuñ hī 'zarra' na ḳhud ko kahtā huuñ

mujh meñ itnī to ḳhud-shanāsī hai

ab na wo lazzat-e-udasi hai

ab hamara firaq basi hai

tere bare mein puchhta hun jise

hichkichahaT use zara si hai

wo hai hasil mere gunahon ka

us ki la'nat kisi du'a si hai

aap ka hai ye imtihan-e-haya

bas hamari to be-libasi hai

toDne ko kaha hai 'ahd-e-wafa

bewafai mein bhi wafa si hai

main na jaanun meri zaban hai kya

is mein KHushbu to reKHta si hai

yun hi 'zarra' na KHud ko kahta hun

mujh mein itni to KHud-shanasi hai