ab nahin hoti hai tanhai pe hairani mujhe

ab nahīñ hotī hai tanhā.ī pe hairānī mujhe

raas aatī jā rahī hai dil kī vīrānī mujhe

tesha-e-ġham se tarāshī jā rahī hai zindagī

rafta rafta mil rahī hai shakl-e-insānī mujhe

tāziyāne dard ke lagte raheñge umr bhar

de ga.ī kaisī sazā.eñ dil kī nādānī mujhe

sargirāñ jab tak rahā maiñ sāhab-e-dastār thā

bechtī phirtī hai ab ye merī arzānī mujhe

haiñ ajal aur zindagī ke darmiyāñ do hī qadam

fāsla lagtā hai ye bhī kitnā tūlānī mujhe

nāḳhudā hairat-ba-damāñ dekhtā hī rah gayā

le ga.ī sāhil se aa ke mauj-e-tūfānī mujhe

ik sukūñ kā saañs lene kā tavaqquf mil sake

kaash ho jaa.e dukhoñ meñ itnī āsānī mujhe

haath phailāte rahe saare zamāne meñ 'shakīl'

dar-ba-dar le kar phirī hai tang-dāmānī mujhe

ab nahin hoti hai tanhai pe hairani mujhe

ras aati ja rahi hai dil ki virani mujhe

tesha-e-gham se tarashi ja rahi hai zindagi

rafta rafta mil rahi hai shakl-e-insani mujhe

taziyane dard ke lagte rahenge umr bhar

de gai kaisi sazaen dil ki nadani mujhe

sargiran jab tak raha main sahab-e-dastar tha

bechti phirti hai ab ye meri arzani mujhe

hain ajal aur zindagi ke darmiyan do hi qadam

fasla lagta hai ye bhi kitna tulani mujhe

naKHuda hairat-ba-daman dekhta hi rah gaya

le gai sahil se aa ke mauj-e-tufani mujhe

ek sukun ka sans lene ka tawaqquf mil sake

kash ho jae dukhon mein itni aasani mujhe

hath phailate rahe sare zamane mein 'shakil'

dar-ba-dar le kar phiri hai tang-damani mujhe