ab qafas hai na aashiyana hai

ab qafas hai na āshiyāna hai

aah apnā kahāñ Thikāna hai

un kī har baat meñ tarahdārī

apnā har taur shā.irāna hai

kyoñ vafāoñ kā maiñ evaz māñgūñ

kyā mirā ishq tājirāna hai

sharh-e-ġham par tumhārī chīñ-ba-jabīñ

dil-e-nāzuk pe tāziyāna hai

is se baḌh kar koī ibādat kyā

merā sar terā āstāna hai

ham ko aadat hai sāf-goī kī

is liye dushman ik zamāna hai

mere ash.ār paḌh rahe haiñ vo

uns kuchh mujh se ġhā.ebāna hai

ahl-e-fan jis ko sher kahte haiñ

kuchh haqīqat hai kuchh fasāna hai

'dāġh'-o-'chakbast' kī zabāñ urdu

kam-nigāhī kā ab nishāna hai

vo merī qadr ḳhaak jāneñge

jin kī fitrat hī hāsidāna hai

bhuul jaao 'bahār' qissa-e-shauq

mashvara merā muḳhlisāna hai

ab qafas hai na aashiyana hai

aah apna kahan Thikana hai

un ki har baat mein tarahdari

apna har taur shairana hai

kyon wafaon ka main ewaz mangun

kya mera ishq tajirana hai

sharh-e-gham par tumhaari chin-ba-jabin

dil-e-nazuk pe taziyana hai

is se baDh kar koi ibaadat kya

mera sar tera aastana hai

hum ko aadat hai saf-goi ki

is liye dushman ek zamana hai

mere ashaar paDh rahe hain wo

uns kuchh mujh se ghaebana hai

ahl-e-fan jis ko sher kahte hain

kuchh haqiqat hai kuchh fasana hai

'dagh'-o-'chakbast' ki zaban urdu

kam-nigahi ka ab nishana hai

wo meri qadr KHak jaanenge

jin ki fitrat hi hasidana hai

bhul jao 'bahaar' qissa-e-shauq

mashwara mera muKHlisana hai