ab qais hai koi na koi aabla-pa hai

ab qais hai koī na koī ābla-pā hai

dil aaTh pahar apnī hadeñ DhūñD rahā hai

ehsās kī vaadī meñ koī saut na sūrat

ye manzil-e-irfān tak aane kā sila hai

zaḳhmoñ ke bayābāñ meñ koī phuul na patthar

yādoñ ke jazīre meñ na but haiñ na ḳhudā hai

ik ḳhaak ke paikar kā tamāsha hai saḌak par

har shaḳhs yahāñ qahr kī tasvīr banā hai

miTTī ke gharauñde meñ sitāroñ ke diye haiñ

āñgan meñ añdherā na ujālā na havā hai

ab anjuman-e-shauq meñ sham.eñ na patiñge

ab marg-e-musalsal kī sazā hai na jazā hai

chashmoñ ko shikāyat hai ki sho.aloñ meñ ghire haiñ

sahrā ko ye dukh hai ki paḌā suukh rahā hai

ab naḳhl-e-rah-e-shauq na saa.e na manāzil

ab ābrū-e-ishq na saudā na vafā hai

ab paañv musāfir haiñ nafas marhala-e-zīst

ab vaqt ke hāthoñ pe na ḳhuuñ hai na hinā hai

ḳhūñ-rañg shafaq-rañg ḳhizāñ-rañg haiñ chehre

jismoñ pe kafan hai na koī surḳh qabā hai

sūraj ko hathelī pe lakīroñ kī tamannā

ab chāñd kī thālī meñ kiran hai na diyā hai

ab dasht ke siine pe faqat aag bichhī hai

ab naqsh-e-kaf-e-pā hai na ab bāñg-e-darā hai

har aañkh chalātī huī tashkīk ke neze

har zehn tajassus kī ridā oḌh chukā hai

alfāz ke chehre se ayaañ shān-e-ḳhamoshī

hoñToñ pe savālāt kā ik jaal bichhā hai

kyuuñ shaam ko bāhoñ meñ ulajhne kī havas hai

kyuuñ sub.h kī palkoñ meñ koī ḳhvāb chhupā hai

kyuuñ raat ke māthe pe chamakte haiñ nagīne

kyuuñ din ke rag-o-pai meñ koī hashr bapā hai

mashriq ke darīchoñ se ghuTan jhāñk rahī hai

maġhrib kī fazāoñ meñ dhuāñ phail chukā hai

āshob-e-nazar ho ki tamannāoñ ke nashtar

har tasht meñ zaḳhmoñ kā ik ambār lagā hai

mandir ke gajar ḳhaak par ab chup se paḌe haiñ

masjid ke manāroñ kā sirā TuuT chukā hai

dīvār bhī dīvār se āzād nahīñ hai

mauhūm ḳhalāoñ meñ bhī zindān-e-havā hai

suqrāt tah-e-ḳhāk yahī soch rahā hai

ab zahr faqat pyaas bujhāne kī davā hai

ab najd ke sahrā meñ na kāñTe na sadā.eñ

ab qais hai koī na koī ābla-pā hai

yuuñ raat jab aa.ī hai to ruknā hī paḌā hai

dast-e-tah-e-sañg-āmada paimān-e-vafā hai

majbūrī o dāvā-e-giraftāri-e-ulfat

har ahd meñ tahzīb ne ye Dhoñg rachā hai

ab qais hai koi na koi aabla-pa hai

dil aaTh pahar apni haden DhunD raha hai

ehsas ki wadi mein koi saut na surat

ye manzil-e-irfan tak aane ka sila hai

zaKHmon ke bayaban mein koi phul na patthar

yaadon ke jazire mein na but hain na KHuda hai

ek KHak ke paikar ka tamasha hai saDak par

har shaKHs yahan qahr ki taswir bana hai

miTTi ke gharaunde mein sitaron ke diye hain

aangan mein andhera na ujala na hawa hai

ab anjuman-e-shauq mein shamen na patinge

ab marg-e-musalsal ki saza hai na jaza hai

chashmon ko shikayat hai ki shoalon mein ghire hain

sahra ko ye dukh hai ki paDa sukh raha hai

ab naKHl-e-rah-e-shauq na sae na manazil

ab aabru-e-ishq na sauda na wafa hai

ab panw musafir hain nafas marhala-e-zist

ab waqt ke hathon pe na KHun hai na hina hai

KHun-rang shafaq-rang KHizan-rang hain chehre

jismon pe kafan hai na koi surKH qaba hai

suraj ko hatheli pe lakiron ki tamanna

ab chand ki thaali mein kiran hai na diya hai

ab dasht ke sine pe faqat aag bichhi hai

ab naqsh-e-kaf-e-pa hai na ab bang-e-dara hai

har aankh chalati hui tashkik ke neze

har zehn tajassus ki rida oDh chuka hai

alfaz ke chehre se ayan shan-e-KHamoshi

honTon pe sawalat ka ek jal bichha hai

kyun sham ko bahon mein ulajhne ki hawas hai

kyun subh ki palkon mein koi KHwab chhupa hai

kyun raat ke mathe pe chamakte hain nagine

kyun din ke rag-o-pai mein koi hashr bapa hai

mashriq ke darichon se ghuTan jhank rahi hai

maghrib ki fazaon mein dhuan phail chuka hai

aashob-e-nazar ho ki tamannaon ke nashtar

har tasht mein zaKHmon ka ek ambar laga hai

mandir ke gajar KHak par ab chup se paDe hain

masjid ke manaron ka sira TuT chuka hai

diwar bhi diwar se aazad nahin hai

mauhum KHalaon mein bhi zindan-e-hawa hai

suqraat tah-e-KHak yahi soch raha hai

ab zahr faqat pyas bujhane ki dawa hai

ab najd ke sahra mein na kanTe na sadaen

ab qais hai koi na koi aabla-pa hai

yun raat jab aai hai to rukna hi paDa hai

dast-e-tah-e-sang-amada paiman-e-wafa hai

majburi o dawa-e-giraftari-e-ulfat

har ahd mein tahzib ne ye Dhong racha hai