ab raha kya jo luTana rah gaya

ab rahā kyā jo luTānā rah gayā

zindagī kā ek ta.ana rah gayā

ik ta.alluq jin se thā dil ko kabhī

ab vo rishta ġhā.ebāna rah gayā

thā jo afsāne meñ afsāne kī jaan

ik vahī jumla baḌhānā rah gayā

zindagī kī lazzateñ ruḳhsat huiiñ

ik taḳhayyul shā.irāna rah gayā

sochtā huuñ aur yaad aatā nahīñ

jaane kyā un ko batānā rah gayā

uljhaneñ maazī kī suljhā.eñ magar

hāl-o-mustaqbil meñ shānā rah gayā

kuchh na rahne ke yahāñ hālāt hoñ

ye bhī kyā kam hai fasāna rah gayā

jā.eza us ne liyā ruḳh kā 'nazar'

sāmne ke ruḳh tak aanā rah gayā

ab raha kya jo luTana rah gaya

zindagi ka ek tana rah gaya

ek talluq jin se tha dil ko kabhi

ab wo rishta ghaebana rah gaya

tha jo afsane mein afsane ki jaan

ek wahi jumla baDhana rah gaya

zindagi ki lazzaten ruKHsat huin

ek taKHayyul shairana rah gaya

sochta hun aur yaad aata nahin

jaane kya un ko batana rah gaya

uljhanen mazi ki suljhaen magar

haal-o-mustaqbil mein shana rah gaya

kuchh na rahne ke yahan haalat hon

ye bhi kya kam hai fasana rah gaya

jaeza us ne liya ruKH ka 'nazar'

samne ke ruKH tak aana rah gaya