ab sarguzisht-e-hijr sunane bhi aaega

ab sarguzisht-e-hijr sunāne bhī aa.egā

jo ruuTh kar gayā hai manāne bhī aa.egā

ban jā.eñgī qarār yahī be-qarāriyāñ

ġham de gayā hai jo vo miTāne bhī aa.egā

rakkhegā rakhne vaalā mirī be-kasī kī laaj

lutf-o-karam kī shaan dikhāne bhī aa.egā

suntā nahīñ jo ab mirā ahvāl vāqa.ī

ik roz le kar apne fasāne bhī aa.egā

ātash-bajāñ haiñ ḳhabar se be-fikr-o-mutma.in

jis ne lagā.ī hai vo bujhāne bhī aa.egā

us ko ḳhulūs-e-dil kī kashish khīñch lā.egī

aa.egā to vo aane bahāne bhī aa.egā

rū-posh ho sakeñgī kahāñ ḳhud-numā.īyāñ

ā.īna-rū jamāl dikhāne bhī aa.egā

nikhregī ye fazā-e-mukaddar bhī ai 'rishī'

māhaul kā mizāj Thikāne bhī aa.egā

ab sarguzisht-e-hijr sunane bhi aaega

jo ruTh kar gaya hai manane bhi aaega

ban jaengi qarar yahi be-qarariyan

gham de gaya hai jo wo miTane bhi aaega

rakkhega rakhne wala meri be-kasi ki laj

lutf-o-karam ki shan dikhane bhi aaega

sunta nahin jo ab mera ahwal waqai

ek roz le kar apne fasane bhi aaega

aatash-bajaan hain KHabar se be-fikr-o-mutmain

jis ne lagai hai wo bujhane bhi aaega

us ko KHulus-e-dil ki kashish khinch laegi

aaega to wo aane bahane bhi aaega

ru-posh ho sakengi kahan KHud-numaiyan

aaina-ru jamal dikhane bhi aaega

nikhregi ye faza-e-mukaddar bhi ai 'rishi'

mahaul ka mizaj Thikane bhi aaega