ab shab-e-gham agar nahin na sahi

ab shab-e-ġham agar nahīñ na sahī

dāman-e-barg tar nahīñ na sahī

zinda-dārān-e-shab ko merī tarah

intizār-e-sahar nahīñ na sahī

dasht-paimā ke ās-pās agar

koī dīvār-o-dar nahīñ na sahī

aam hai justujū-e-jahl-e-ḳhirad

shahr meñ dīda-var nahīñ na sahī

haiñ farishte azal se tang-nazar

aadmī mo'atabar nahīñ na sahī

dil dhaḌakte hoñ saath saath agar

yaad pesh-e-nazar nahīñ na sahī

har-nafas ek tāziyāna hai

aah meñ kuchh asar nahīñ na sahī

maut hai mustaqil ta.āqub meñ

zindagī ḳhud-nigar nahīñ na sahī

sar uThā kar zamīñ pe chaltā huuñ

sar chhupāne ko ghar nahīñ na sahī

peḌ paudoñ kī kuchh kamī to nahīñ

ek sūkhā shajar nahīñ na sahī

ab shab-e-gham agar nahin na sahi

daman-e-barg tar nahin na sahi

zinda-daran-e-shab ko meri tarah

intizar-e-sahar nahin na sahi

dasht-paima ke aas-pas agar

koi diwar-o-dar nahin na sahi

aam hai justuju-e-jahl-e-KHirad

shahr mein dida-war nahin na sahi

hain farishte azal se tang-nazar

aadmi mo'atabar nahin na sahi

dil dhaDakte hon sath sath agar

yaad pesh-e-nazar nahin na sahi

har-nafas ek taziyana hai

aah mein kuchh asar nahin na sahi

maut hai mustaqil taaqub mein

zindagi KHud-nigar nahin na sahi

sar uTha kar zamin pe chalta hun

sar chhupane ko ghar nahin na sahi

peD paudon ki kuchh kami to nahin

ek sukha shajar nahin na sahi