ab tak to kami kuchh na hui dagh-e-jigar mein

ab tak to kamī kuchh na huī dāġh-e-jigar meñ

barsoñ se charāġh ek hī jaltā rahā ghar meñ

zāhir meñ hañse vo magar aañsū nikal aa.e

thā koī asar bhī mire marne kī ḳhabar meñ

rañg uḌne na dūñgā tirī tasvīr ke ruḳh se

baaqī abhī kuchh ḳhuun ke ḳhatre haiñ jigar meñ

tausī-e-ḳhayālāt kī had mil nahīñ saktī

chhoTā sā bayābāñ nazar aa jaatā hai ghar meñ

ab baḌh nahīñ saktā ġham-e-duniyā ye ḳhushī hai

zaḳhmoñ kī jagah tak nahīñ baaqī hai jigar meñ

in añkhḌiyoñ ke surḳh maiñ Dore nahīñ bhūlā

ye bijliyāñ aisī haiñ jo ab tak haiñ nazar meñ

nā-vāqif-e-anjām kā dil hotā hai kitnā

ḳhud ro diyā dekhe jo kabhī zaḳhm jigar meñ

us daur meñ aap aa.e the ai hazrat-e-'jāved'

jis ahd meñ kuchh farq na thā aib-o-hunar meñ

ab tak to kami kuchh na hui dagh-e-jigar mein

barson se charagh ek hi jalta raha ghar mein

zahir mein hanse wo magar aansu nikal aae

tha koi asar bhi mere marne ki KHabar mein

rang uDne na dunga teri taswir ke ruKH se

baqi abhi kuchh KHun ke KHatre hain jigar mein

tausi-e-KHayalat ki had mil nahin sakti

chhoTa sa bayaban nazar aa jata hai ghar mein

ab baDh nahin sakta gham-e-duniya ye KHushi hai

zaKHmon ki jagah tak nahin baqi hai jigar mein

in ankhDiyon ke surKH main Dore nahin bhula

ye bijliyan aisi hain jo ab tak hain nazar mein

na-waqif-e-anjam ka dil hota hai kitna

KHud ro diya dekhe jo kabhi zaKHm jigar mein

us daur mein aap aae the ai hazrat-e-'jawed'

jis ahd mein kuchh farq na tha aib-o-hunar mein