ab tak to tha niyat pe ab shak hai liyaqat pe

ab tak to thā nīyat pe ab shak hai liyāqat pe

kaafī hai ye ik misra' qaa.id kī qayādat pe

voToñ ke liye dange ab 'aam rivāyat hai

gar ye hai siyāsat to lā'nat hai siyāsat pe

ye kaaTh kī hāñDī ko phir phir haiñ chaḌhā lete

hairāñ hai jahāñ in kī is fan meñ mahārat pe

kyā ḳhuub qavā.id haiñ ye amn-bahālī ke

āzād hai nafrat aur pahre haiñ mohabbat pe

ghaḌiyāl ke aañsū ye kyā ḳhuub bahāte haiñ

dahqān kī ġhurbat pe mazdūr kī hālat pe

ye ahl-e-siyāsat sab, bas un ke piyāde haiñ

qābiz haiñ jo kuchh kunbe kul mulk kī daulat pe

sadiyoñ kī ġhulāmī kā shāyad hai asar baaqī

bajtī hai yahāñ taalī hākim kī himāqat pe

har fatvā-e-muftī meñ thā daḳhl-e-shah-e-daurāñ

kyoñ aaj uThāte ho angusht adālat pe

sar sharm se jhuktā hai afgār hai dil hotā

hotī hai siyāsat jab afsos shahādat pe

rahbar hai 'sadā' kaun ab kuchh aas kareñ jis se

ik bhī to nahīñ chaltā ab rāh-e-sadāqat pe

ab tak to tha niyat pe ab shak hai liyaqat pe

kafi hai ye ek misra' qaid ki qayaadat pe

woTon ke liye dange ab 'am riwayat hai

gar ye hai siyasat to la'nat hai siyasat pe

ye kaTh ki hanDi ko phir phir hain chaDha lete

hairan hai jahan in ki is fan mein mahaarat pe

kya KHub qawaid hain ye amn-bahaali ke

aazad hai nafrat aur pahre hain mohabbat pe

ghaDiyal ke aansu ye kya KHub bahate hain

dahqan ki ghurbat pe mazdur ki haalat pe

ye ahl-e-siyasat sab, bas un ke piyaade hain

qabiz hain jo kuchh kunbe kul mulk ki daulat pe

sadiyon ki ghulami ka shayad hai asar baqi

bajti hai yahan tali hakim ki himaqat pe

har fatwa-e-mufti mein tha daKHl-e-shah-e-dauran

kyon aaj uThate ho angusht adalat pe

sar sharm se jhukta hai afgar hai dil hota

hoti hai siyasat jab afsos shahadat pe

rahbar hai 'sada' kaun ab kuchh aas karen jis se

ek bhi to nahin chalta ab rah-e-sadaqat pe