ab teri mohabbat mein jo bimar hai bimar

ab terī mohabbat meñ jo bīmār hai bīmār

jiitā hai na martā hai na is paar na us paar

va.ade ke liye lab bhī hilānā tumheñ dushvār

but kī tarah ḳhāmosh na iqrār na inkār

nikle jo marīzoñ kī ayādat ko vo ghar se

kuchh soch ke har achchhā bhalā ban gayā bīmār

hai lab pe abhī tum to abhī tū are tauba

kyā aap kī guftār hai kyā aap kī guftār

uf arz-e-tamannā pe tirī nīchī nigāheñ

iqrār kā iqrār hai inkār kā inkār

is daur meñ insāñ kā ajab haal hai 'shabbar'

jiine kā bhī armān hai jiine se bhī bezār

ab teri mohabbat mein jo bimar hai bimar

jita hai na marta hai na is par na us par

wade ke liye lab bhi hilana tumhein dushwar

but ki tarah KHamosh na iqrar na inkar

nikle jo marizon ki ayaadat ko wo ghar se

kuchh soch ke har achchha bhala ban gaya bimar

hai lab pe abhi tum to abhi tu are tauba

kya aap ki guftar hai kya aap ki guftar

uf arz-e-tamanna pe teri nichi nigahen

iqrar ka iqrar hai inkar ka inkar

is daur mein insan ka ajab haal hai 'shabbar'

jine ka bhi arman hai jine se bhi bezar