ab to aksar ye sochta hun main

ab to aksar ye sochtā huuñ maiñ

bā-vafā huuñ ki bevafā huuñ maiñ

chhā gayā kaun merī hastī par

saare aalam pe chhā gayā huuñ maiñ

kyoñ koī nāḳhudā talāsh karūñ

ḳhud hī kashtī kā nāḳhudā huuñ maiñ

ab mujhe DhūñDhnā nahīñ āsān

terī yādoñ meñ kho chukā huuñ maiñ

zindagī kī maiñ bhiik kyoñ māñgūñ

zindagī se to māvarā huuñ maiñ

ālam-e-hosh ne qadam chūme

be-ḳhudī meñ jidhar gayā huuñ maiñ

hādsoñ ne mujhe tarāshā hai

varna patthar se khurdurā huuñ maiñ

kyā ġharaz hai mujhe farishtoñ se

koī insān DhūñDhtā huuñ maiñ

is tarah dekhte haiñ log mujhe

jaise terī koī adā huuñ maiñ

aap zahmat na kījiye ai ḳhizr

apnī manzil se āshnā huuñ maiñ

koī kah de ye bijliyoñ se 'bahār'

phir nasheman banā rahā huuñ maiñ

ab to aksar ye sochta hun main

ba-wafa hun ki bewafa hun main

chha gaya kaun meri hasti par

sare aalam pe chha gaya hun main

kyon koi naKHuda talash karun

KHud hi kashti ka naKHuda hun main

ab mujhe DhunDhna nahin aasan

teri yaadon mein kho chuka hun main

zindagi ki main bhik kyon mangun

zindagi se to mawara hun main

aalam-e-hosh ne qadam chume

be-KHudi mein jidhar gaya hun main

hadson ne mujhe tarasha hai

warna patthar se khurdura hun main

kya gharaz hai mujhe farishton se

koi insan DhunDhta hun main

is tarah dekhte hain log mujhe

jaise teri koi ada hun main

aap zahmat na kijiye ai KHizr

apni manzil se aashna hun main

koi kah de ye bijliyon se 'bahaar'

phir nasheman bana raha hun main