ab to hujum-e-yas ki kuchh intiha nahin

ab to hujūm-e-yās kī kuchh intihā nahīñ

ya.anī mujhe umiid kā bhī aasrā nahīñ

kab ham se be-diloñ pe nigāh-e-jafā nahīñ

ham ḳhuub jānte haiñ ki tū bevafā nahīñ

ai rashk-e-parda-soz shikāyat kī jā nahīñ

vo bazm-e-nāz hai dil-e-be-mudda.ā nahīñ

dikhlā.e phir ḳhudā na vo māyūsiyoñ ke din

hotā thā ye ḳhayāl ki hai yā ḳhudā nahīñ

allah re be-niyāzī-e-āsūdgān-e-ḳhāk

is qurb par kisī se koī boltā nahīñ

aatī hai zarre zarre se āvāz-e-bāzgasht

phir bhī ye kah rahā hai abhī kuchh kahā nahīñ

vo ḳhud bhī dafn ho ga.ī ahl-e-vafā ke saath

bekār DhūñDhtā hai jahāñ meñ vafā nahīñ

hai jalva-rez-e-bazm-e-tasavvur jamāl-e-yār

ai shauq-e-dīd ab ye taġhāful ravā nahīñ

jaatī hai koī majma.a-e-mahshar pe yaañ nazar

vo parda-e-hujūm-e-tamannā uThā nahīñ

sadqe tire karam ke na de zahmat-e-savāl

kashkol hai faqīr kā dast-e-duā nahīñ

sayyād qaid kar ke mujhe dekh le zarā

dil ḳhuuñ na ho to bulbul-e-ḳhūnīñ-navā nahīñ

mahrūmiyoñ se zauq hai majbūriyoñ se ishq

maiñ kāmyāb huuñ ye mirā mudda.ā nahīñ

vo dīda-hā-e-shauq ki dekheñ tirā jamāl

kis kā bahisht kuchh bhī unheñ dīkhtā nahīñ

kyoñ us ke chūmte hī na me.arāj ho nasīb

'beḳhud' ḳhudā kā haath hai dast-e-duā nahīñ

ab to hujum-e-yas ki kuchh intiha nahin

yani mujhe umid ka bhi aasra nahin

kab hum se be-dilon pe nigah-e-jafa nahin

hum KHub jaante hain ki tu bewafa nahin

ai rashk-e-parda-soz shikayat ki ja nahin

wo bazm-e-naz hai dil-e-be-muddaa nahin

dikhlae phir KHuda na wo mayusiyon ke din

hota tha ye KHayal ki hai ya KHuda nahin

allah re be-niyazi-e-asudgan-e-KHak

is qurb par kisi se koi bolta nahin

aati hai zarre zarre se aawaz-e-bazgasht

phir bhi ye kah raha hai abhi kuchh kaha nahin

wo KHud bhi dafn ho gai ahl-e-wafa ke sath

bekar DhunDhta hai jahan mein wafa nahin

hai jalwa-rez-e-bazm-e-tasawwur jamal-e-yar

ai shauq-e-did ab ye taghaful rawa nahin

jati hai koi majma-e-mahshar pe yan nazar

wo parda-e-hujum-e-tamanna uTha nahin

sadqe tere karam ke na de zahmat-e-sawal

kashkol hai faqir ka dast-e-dua nahin

sayyaad qaid kar ke mujhe dekh le zara

dil KHun na ho to bulbul-e-KHunin-nawa nahin

mahrumiyon se zauq hai majburiyon se ishq

main kaamyab hun ye mera muddaa nahin

wo dida-ha-e-shauq ki dekhen tera jamal

kis ka bahisht kuchh bhi unhen dikhta nahin

kyon us ke chumte hi na mearaj ho nasib

'beKHud' KHuda ka hath hai dast-e-dua nahin