ab to jo manzar-e-shadab nazar aata hai

ab to jo manzar-e-shādāb nazar aatā hai

aisā lagtā hai koī ḳhvāb nazar aatā hai

is hasīñ shahr meñ har samt hai logoñ kā hujūm

aur insāñ hai ki nāyāb nazar aatā hai

kab talak jins-e-vafā shahr meñ arzāñ hogī

ab ye dariyā bhī to pāyāb nazar aatā hai

gardish-e-vaqt ne aise bhī tarāshe haiñ sarāb

dasht-e-be-āb meñ girdāb nazar aatā hai

hone lagtā hai tire qurb kā ehsās mujhe

chaudhvīñ shab ko jo mahtāb nazar aatā hai

terī añgusht-e-hinā.ī kā jise lams mile

vo nagīna baḌā ḳhush-āb nazar aatā hai

us kī ḳhushbū se mo.attar mirā āñgan hai 'ra.īs'

jāgtī aañkh se ye ḳhvāb nazar aatā hai

ab to jo manzar-e-shadab nazar aata hai

aisa lagta hai koi KHwab nazar aata hai

is hasin shahr mein har samt hai logon ka hujum

aur insan hai ki nayab nazar aata hai

kab talak jins-e-wafa shahr mein arzan hogi

ab ye dariya bhi to payab nazar aata hai

gardish-e-waqt ne aise bhi tarashe hain sarab

dasht-e-be-ab mein girdab nazar aata hai

hone lagta hai tere qurb ka ehsas mujhe

chaudhwin shab ko jo mahtab nazar aata hai

teri angusht-e-hinai ka jise lams mile

wo nagina baDa KHush-ab nazar aata hai

us ki KHushbu se moattar mera aangan hai 'rais'

jagti aankh se ye KHwab nazar aata hai