ab to muqabla hai ruKH-o-zulf-e-yar mein

ab to muqābla hai ruḳh-o-zulf-e-yār meñ

hai fasl kā mubāhisa lail-o-nahār meñ

mumkin nahīñ hai fasl ruḳh-o-zulf-e-yār meñ

kab infisāl ho sake lail-o-nahār meñ

jis ko ġharaz ho jaa.e vo tauba kī chhāñv meñ

baiThā huuñ maiñ to sāya-e-dīvār-e-yār meñ

jis qāfile meñ saath ho mahmil-nashīñ mirā

lailā vahāñ kahāñ ho shumār-o-qatār meñ

mash.hūr to haiñ vāmiq-o-farhād-o-qais-o-nal

mujh sā nahīñ hai ek bhī in tiin chaar meñ

us sang-dil ko hai vahī aġhmāz go yahāñ

jaa.e phaḌak ke jaan nikal intizār meñ

qāsid jo phir ke aa.e to phir tan meñ jaan aa.e

martā javāb-e-nāma ke huuñ intizār meñ

behosh kartā hai tirā kahnā ye naaz se

mujh ko na chheḌ niiñd ke huuñ maiñ ḳhumār meñ

ḳhurshīd kī tarah maiñ sarāpā huuñ ek daaġh

dāġhoñ kī aur jā nahīñ is jism-e-zār meñ

iizā hai sā.iloñ se mudām ahl-e-faiz ko

patthar lagāte haiñ shajar-e-meva-dār meñ

'daula' ġhazal ik aur sunā is zamīn meñ

baaqī hai josh bhī to dil-e-be-qarār meñ

ab to muqabla hai ruKH-o-zulf-e-yar mein

hai fasl ka mubahisa lail-o-nahaar mein

mumkin nahin hai fasl ruKH-o-zulf-e-yar mein

kab infisal ho sake lail-o-nahaar mein

jis ko gharaz ho jae wo tauba ki chhanw mein

baiTha hun main to saya-e-diwar-e-yar mein

jis qafile mein sath ho mahmil-nashin mera

laila wahan kahan ho shumar-o-qatar mein

mashhur to hain wamiq-o-farhad-o-qais-o-nal

mujh sa nahin hai ek bhi in tin chaar mein

us sang-dil ko hai wahi aghmaz go yahan

jae phaDak ke jaan nikal intizar mein

qasid jo phir ke aae to phir tan mein jaan aae

marta jawab-e-nama ke hun intizar mein

behosh karta hai tera kahna ye naz se

mujh ko na chheD nind ke hun main KHumar mein

KHurshid ki tarah main sarapa hun ek dagh

daghon ki aur ja nahin is jism-e-zar mein

iza hai sailon se mudam ahl-e-faiz ko

patthar lagate hain shajar-e-mewa-dar mein

'daula' ghazal ek aur suna is zamin mein

baqi hai josh bhi to dil-e-be-qarar mein