ab to sahra mein rahenge chal ke diwanon ke sath

ab to sahrā meñ raheñge chal ke dīvānoñ ke saath

dahr meñ mushkil huā jiinā jo farzānoñ ke saath

ḳhatm ho jā.eñge qisse kal ye dīvānoñ ke saath

phir inheñ dohrāoge tum kitne unvānoñ ke saath

bazm meñ ham ko bulā kar aap uTh kar chal diye

kyā sulūk-e-nāravā jaa.ez hai mehmānoñ ke saath

nafrateñ phailā rahe haiñ kaisī shaiḳh-o-barhaman

kyā shumār in kā kareñge aap insānoñ ke saath

un kī āñkhoñ kī gulābī se jo ham maḳhmūr haiñ

ik ta’alluq hai qadīmī ham ko paimānoñ ke saath

har taraf kū-e-butāñ meñ hasratoñ kā hai hujūm

ek dil laa.e the ham to apnā armānoñ ke saath

kal talak dānāoñ kī sohbat meñ the sab ke imaam

aaj kaise sust haiñ yuuñ shaiḳh nā-dānoñ ke saath

un kī āñkheñ ik taraf ye jām-o-mīnā ik taraf

kis tarah gardish meñ haiñ paimāne paimānoñ ke saath

'āshiqoñ ke dil meñ shab fānūs raushan ho ga.e

sham' kā jiinā hai lāzim apne parvānoñ ke saath

haif gulzār-e-jahāñ meñ gul yagāne ho ga.e

lahlahā kar ab rahegā sabza begānoñ ke saath

ab to sahra mein rahenge chal ke diwanon ke sath

dahr mein mushkil hua jina jo farzanon ke sath

KHatm ho jaenge qisse kal ye diwanon ke sath

phir inhen dohraoge tum kitne unwanon ke sath

bazm mein hum ko bula kar aap uTh kar chal diye

kya suluk-e-narawa jaez hai mehmanon ke sath

nafraten phaila rahe hain kaisi shaiKH-o-barhaman

kya shumar in ka karenge aap insanon ke sath

un ki aankhon ki gulabi se jo hum maKHmur hain

ek ta’alluq hai qadimi hum ko paimanon ke sath

har taraf ku-e-butan mein hasraton ka hai hujum

ek dil lae the hum to apna armanon ke sath

kal talak danaon ki sohbat mein the sab ke imam

aaj kaise sust hain yun shaiKH na-danon ke sath

un ki aankhen ek taraf ye jam-o-mina ek taraf

kis tarah gardish mein hain paimane paimanon ke sath

'ashiqon ke dil mein shab fanus raushan ho gae

sham' ka jina hai lazim apne parwanon ke sath

haif gulzar-e-jahan mein gul yagane ho gae

lahlaha kar ab rahega sabza beganon ke sath