ab to taqlid ke zindan se nikalne do mujhe

ab to taqlīd ke zindāñ se nikalne do mujhe

vaqt badlā hai to thoḌā sā badalne do mujhe

maiñ kahāñ aur kahāñ vaqt ke namrūd kī aag

apne hī sho.ala-e-ehsās meñ jalne do mujhe

kis liye aa ke khaḌī hai mire aage zulmat

maiñ to sūraj huuñ nikalnā hai nikalne do mujhe

chhūT jaa.e na kahīñ haath se dāmān-e-vafā

kuchh to ai gardish-e-ayyām sañbhalne do mujhe

mujh ko manzūr nahīñ ġhair kā qālib hargiz

apne TuuTe hue sāñche hī meñ Dhalne do mujhe

ḳhvāb kī dhund hai kuchh der meñ chhaT jā.egī

so ke uTThā huuñ zarā aañkh to malne do mujhe

hogā irfān-e-haqīqat bhī kisī din 'ahmad'

kūcha-e-vahm-o-gumāñ se to nikalne do mujhe

ab to taqlid ke zindan se nikalne do mujhe

waqt badla hai to thoDa sa badalne do mujhe

main kahan aur kahan waqt ke namrud ki aag

apne hi shoala-e-ehsas mein jalne do mujhe

kis liye aa ke khaDi hai mere aage zulmat

main to suraj hun nikalna hai nikalne do mujhe

chhuT jae na kahin hath se daman-e-wafa

kuchh to ai gardish-e-ayyam sanbhalne do mujhe

mujh ko manzur nahin ghair ka qalib hargiz

apne TuTe hue sanche hi mein Dhalne do mujhe

KHwab ki dhund hai kuchh der mein chhaT jaegi

so ke uTTha hun zara aankh to malne do mujhe

hoga irfan-e-haqiqat bhi kisi din 'ahmad'

kucha-e-wahm-o-guman se to nikalne do mujhe