ab to yahi hain dil se duaen

ab to yahī haiñ dil se du'ā.eñ

bhūlne vaale bhuul hī jaa.eñ

baat to jab hai yuuñ vo rulā.eñ

daaġh bhī dil ke dhulte jaa.eñ

vaj.h-e-sitam kuchh ho to batā.eñ

ek mohabbat laakh ḳhatā.eñ

dard-e-mohabbat dil meñ chhupāyā

aañkh ke aañsū kaise chhupā.eñ

hosh aur un kī diid kā dā'vā

dekhne vaale hosh meñ aa.eñ

dil kī tabāhī bhūle nahīñ ham

dete haiñ ab tak tum ko du'ā.eñ

rang-e-zamāna dekhne vaale

un kī nazar bhī dekhte jaa.eñ

shaġhl-e-mohabbat ab hai ye 'taskīñ'

she'r kaheñ aur jī bahlā.eñ

ab to yahi hain dil se du'aen

bhulne wale bhul hi jaen

baat to jab hai yun wo rulaen

dagh bhi dil ke dhulte jaen

wajh-e-sitam kuchh ho to bataen

ek mohabbat lakh KHataen

dard-e-mohabbat dil mein chhupaya

aankh ke aansu kaise chhupaen

hosh aur un ki did ka da'wa

dekhne wale hosh mein aaen

dil ki tabahi bhule nahin hum

dete hain ab tak tum ko du'aen

rang-e-zamana dekhne wale

un ki nazar bhi dekhte jaen

shaghl-e-mohabbat ab hai ye 'taskin'

she'r kahen aur ji bahlaen