ab to zeba nahin ai rind gila bhi tera

ab to zebā nahīñ ai rind gila bhī terā

jaam saaqī ne sar-e-bazm bharā bhī terā

dil meñ jab garmī-e-iḳhlās-o-mohabbat hī nahīñ

kaam aane kā nahīñ harf-e-du'ā bhī terā

be-ḳhatar Daal de maujoñ meñ safīna apnā

nāḳhudā bhī hai tirā aur ḳhudā bhī terā

aaj tūfān uThāne ko uThā le lekin

zor ghaT jā.egā ai mauj-e-balā bhī terā

lab hilāne kī yahāñ jabki ijāzat hī nahīñ

kis zabāñ se kareñ ai dost gila bhī terā

ham to haiñ aaj bhī mahrūm-e-nazārā 'bahzād'

ek vo haiñ jinheñ dīdār huā bhī terā

ab to zeba nahin ai rind gila bhi tera

jam saqi ne sar-e-bazm bhara bhi tera

dil mein jab garmi-e-iKHlas-o-mohabbat hi nahin

kaam aane ka nahin harf-e-du'a bhi tera

be-KHatar Dal de maujon mein safina apna

naKHuda bhi hai tera aur KHuda bhi tera

aaj tufan uThane ko uTha le lekin

zor ghaT jaega ai mauj-e-bala bhi tera

lab hilane ki yahan jabki ijazat hi nahin

kis zaban se karen ai dost gila bhi tera

hum to hain aaj bhi mahrum-e-nazara 'bahzad'

ek wo hain jinhen didar hua bhi tera