ab un se pursish-e-haalat ho to kaise ho

ab un se pursish-e-hālāt ho to kaise ho

nazar nazar nigarāñ baat ho to kaise ho

jahāñ banā.e koī baat hī nahīñ bantī

vahāñ talāfī-e-māfāt ho to kaise ho

udhar naqāb-e-marātib idhar hijāb-e-anā

ye fāsle haiñ mulāqāt ho to kaise ho

vo jis ke dam se 'ibārat hai zindagī nāseh

usī se tark-e-muvālāt ho to kaise ho

jo apnī 'azmat-e-aqdār se nahīñ vāqif

vo pāsbān-e-rivāyāt ho to kaise ho

badalte rahte haiñ andāz us jafā-jū ke

yaqīn-e-lutf-o-‘ināyāt ho to kaise ho

ġham-e-jahāñ kā bhī kuchh haq hai 'bazm' ġhaur karo

tamām 'umr ġham-e-zāt ho to kaise ho

ab un se pursish-e-haalat ho to kaise ho

nazar nazar nigaran baat ho to kaise ho

jahan banae koi baat hi nahin banti

wahan talafi-e-mafat ho to kaise ho

udhar naqab-e-maraatib idhar hijab-e-ana

ye fasle hain mulaqat ho to kaise ho

wo jis ke dam se 'ibarat hai zindagi naseh

usi se tark-e-muwalat ho to kaise ho

jo apni 'azmat-e-aqdar se nahin waqif

wo pasban-e-riwayat ho to kaise ho

badalte rahte hain andaz us jafa-ju ke

yaqin-e-lutf-o-‘inayat ho to kaise ho

gham-e-jahan ka bhi kuchh haq hai 'bazm' ghaur karo

tamam 'umr gham-e-zat ho to kaise ho