ab usko chahiye ja kar kisi se pyar kare

ab us ko chāhiye jā kar kisī se pyaar kare

yā merā agle janam tak kā intizār kare

kisī kalī kī hifāzat kī phuul banñe tak

vo aisā kaam kare hai ki jaise ḳhaar kare

maiñ kā.enāt ke hone kā raaz DhūñDūñgā

talāsh-e-āz bhale mujh ko ḳhvār-o-zār kare

vo hogā chor magar phir bhī mujh ko hogā 'azīz

jo koī bhī mirī taḳhlīq kā shikār kare

koī shai itnā nahīñ tang kartī hai 'jānif'

ki jitnā logoñ ko ik lambī sī qatār kare

tamām log pareshānī kī giraft meñ haiñ

ḳhudā ko chāhiye aa.e sabhī ko pyaar kare

ab us ko chahiye ja kar kisi se pyar kare

ya mera agle janam tak ka intizar kare

kisi kali ki hifazat ki phul banne tak

wo aisa kaam kare hai ki jaise KHar kare

main kaenat ke hone ka raaz DhunDunga

talash-e-az bhale mujh ko KHwar-o-zar kare

wo hoga chor magar phir bhi mujh ko hoga 'aziz

jo koi bhi meri taKHliq ka shikar kare

koi shai itna nahin tang karti hai 'jaanif'

ki jitna logon ko ek lambi si qatar kare

tamam log pareshani ki giraft mein hain

KHuda ko chahiye aae sabhi ko pyar kare