ab wahan kyon mujhko jata hai dil-e-muztar liye

ab vahāñ kyoñ mujh ko jaatā hai dil-e-muztar liye

āshiqoñ ke naam to us ne register kar liye

halq se utrī to yaad aane lagā tauf-e-haram

mai-kade meñ shaiḳh sāhib ne ka.ī chakkar liye

ūñTnī par kar liyā lailā ne duniyā bhar kā tour

qais sāhib dasht meñ baiThe rahe daftar liye

ye buḌhāpā aur hūrān-e-bahishtī kā ḳhayāl

shaiḳh jī phirte haiñ ma.ajūn-e-shabāb-āvar liye

zindagī dushvār hai atom bamoñ ke daur meñ

vāqa.ī achchhe rahe jo ham se pahle mar liye

aa ke darbāñ ne vahīñ merā bichhaunā kar diyā

un ke darvāze meñ maiñ jab ghus gayā bistar liye

līDarān-e-qaum kā ‘ustād’ yuuñ chaltā hai kaam

qaum par aañsū bahā.e aur dāman bhar liye

ab wahan kyon mujh ko jata hai dil-e-muztar liye

aashiqon ke nam to us ne register kar liye

halq se utri to yaad aane laga tauf-e-haram

mai-kade mein shaiKH sahib ne kai chakkar liye

unTni par kar liya laila ne duniya bhar ka tour

qais sahib dasht mein baiThe rahe daftar liye

ye buDhapa aur huran-e-bahishti ka KHayal

shaiKH ji phirte hain majun-e-shabab-awar liye

zindagi dushwar hai atom bamon ke daur mein

waqai achchhe rahe jo hum se pahle mar liye

aa ke darban ne wahin mera bichhauna kar diya

un ke darwaze mein main jab ghus gaya bistar liye

liDaran-e-qaum ka ‘ustad’ yun chalta hai kaam

qaum par aansu bahae aur daman bhar liye