ab wo jo nahin unki tamanna bhi bahut hai

ab vo jo nahīñ un kī tamannā bhī bahut hai

jiine ke liye shorish-e-duniyā bhī bahut hai

ab sard-havā sho.ala-e-jāñ soz-e-junūñ bhī

ab garmī-e-husn-e-ruḳh-e-zebā bhī bahut hai

ḳhush-kāmatī-e-sarv kā charchā hai ġhanīmat

ab tazkira-e-nargis-o-lāla bhī bahut hai

tum kaun se the aise sazā-vār-e-ināyat

vo pūchh rahe haiñ tumheñ itnā bhī bahut hai

yā talḳhi-e-mai hī thī javāb-e-ġham-e-duniyā

yā zikr-e-mai-o-sāġhar-o-mīnā bhī bahut hai

yā gardish-e-daurāñ ko bhī ḳhātir meñ na laate

yā ab kisī ummīd pe jiinā bhī bahut hai

ab wo jo nahin un ki tamanna bhi bahut hai

jine ke liye shorish-e-duniya bhi bahut hai

ab sard-hawa shoala-e-jaan soz-e-junun bhi

ab garmi-e-husn-e-ruKH-e-zeba bhi bahut hai

KHush-kaamati-e-sarw ka charcha hai ghanimat

ab tazkira-e-nargis-o-lala bhi bahut hai

tum kaun se the aise saza-war-e-inayat

wo puchh rahe hain tumhein itna bhi bahut hai

ya talKHi-e-mai hi thi jawab-e-gham-e-duniya

ya zikr-e-mai-o-saghar-o-mina bhi bahut hai

ya gardish-e-dauran ko bhi KHatir mein na late

ya ab kisi ummid pe jina bhi bahut hai