ab yahan koi nahin pahle yahan tha koi

ab yahāñ koī nahīñ pahle yahāñ thā koī

jis ke dam se ye makāñ aur makāñ thā koī

dā.era dā.era thā jis se vo markaz na rahā

jab vo thā nuqta-e-be-qibla kahāñ thā koī

nañg-e-maidāñ hai jo ab zīnat-e-maidāñ thā kabhī

ab jahāñ gum huuñ vahāñ pahle ravāñ thā koī

merī shāḳheñ mire patte mujhe sab chhoḌ ga.e

jaise maiñ bā.is-e-yalġhār-e-ḳhizāñ thā koī

yahī saa.e the magar tez thī jab shauq kī lau

fitna-e-dil thā koī āfat-e-jāñ thā koī

huuñ vo lamha ki na mānoge rahūñgā jab tak

na rahūñgā to ḳhayāl aa.egā haañ thā koī

raaz merā na khulegā ye khulegā mire ba.ad

kuchh na thā jis pe muqarrar nigarāñ thā koī

āsmānoñ se tū kyā toḌ ke lā.egā 'muhib'

qaht kyā chāñd ke TukḌoñ kā yahāñ thā koī

ab yahan koi nahin pahle yahan tha koi

jis ke dam se ye makan aur makan tha koi

daera daera tha jis se wo markaz na raha

jab wo tha nuqta-e-be-qibla kahan tha koi

nang-e-maidan hai jo ab zinat-e-maidan tha kabhi

ab jahan gum hun wahan pahle rawan tha koi

meri shaKHen mere patte mujhe sab chhoD gae

jaise main bais-e-yalghaar-e-KHizan tha koi

yahi sae the magar tez thi jab shauq ki lau

fitna-e-dil tha koi aafat-e-jaan tha koi

hun wo lamha ki na manoge rahunga jab tak

na rahunga to KHayal aaega han tha koi

raaz mera na khulega ye khulega mere baad

kuchh na tha jis pe muqarrar nigaran tha koi

aasmanon se tu kya toD ke laega 'muhib'

qaht kya chand ke TukDon ka yahan tha koi