ab yahan logon ke dukh-sukh ka pata kya aae

ab yahāñ logoñ ke dukh-sukh kā patā kyā aa.e

band hoñ ghar to makīnoñ kī sadā kyā aa.e

Dūbte din kī jilau meñ na sukūñ hai na farāġh

shafaq-e-shām se chehroñ pe ziyā kyā aa.e

sard sīnoñ meñ panapte hī nahīñ dard ke biij

in ḳharāboñ pe barasne ko ghaTā kyā aa.e

duur ho kaise tire jism tirī jaañ kī ghuTan

tañg be-rauzan-o-dar ghar meñ havā kyā aa.e

kho chuke lutf-e-sahar-ḳhezī garāñ ḳhvāb-e-makīn

sub.h-dam band darīchoñ meñ sabā kyā aa.e

ḳhushk patte haiñ ki jhaḌte hī nahīñ peḌoñ se

kaise tabdīl ho rut rañg nayā kyā aa.e

garm hañgāma kare kaun ragoñ meñ 'shāhīñ'

ḳhushk nadiyoñ meñ koī mauj-e-balā kyā aa.e

ab yahan logon ke dukh-sukh ka pata kya aae

band hon ghar to makinon ki sada kya aae

Dubte din ki jilau mein na sukun hai na faragh

shafaq-e-sham se chehron pe ziya kya aae

sard sinon mein panapte hi nahin dard ke bij

in KHarabon pe barasne ko ghaTa kya aae

dur ho kaise tere jism teri jaan ki ghuTan

tang be-rauzan-o-dar ghar mein hawa kya aae

kho chuke lutf-e-sahar-KHezi garan KHwab-e-makin

subh-dam band darichon mein saba kya aae

KHushk patte hain ki jhaDte hi nahin peDon se

kaise tabdil ho rut rang naya kya aae

garm hangama kare kaun ragon mein 'shahin'

KHushk nadiyon mein koi mauj-e-bala kya aae