ab ye khula ki ishq ka pindar kuchh nahin

ab ye khulā ki ishq kā pindār kuchh nahīñ

dīvār gir ga.ī pas-e-dīvār kuchh nahīñ

jis ne samajh liyā thā mujhe āsamān par

ab jāntā hai vo mirā kirdār kuchh nahīñ

ḳhud mujh ko e'timād nahīñ apnī zaat par

inkār merā kuchh nahīñ iqrār kuchh nahīñ

vo bhī samajh gayā ki havas kā ye khel hai

ab mad.h-e-chashm-o-gesū-o-ruḳhsār kuchh nahīñ

mizrāb-e-ġham ne aur bhī ḳhāmosh kar diyā

go khiñch gayā hai saaz kā har taar kuchh nahīñ

maiñ bojh huuñ to pheñk de ai kurra-e-zamīn

kuchh aur tez ghuum ye raftār kuchh nahīñ

dhundlā gayā hai shīsha-e-ma.asūmiyat 'ḳhayāl'

ab infi.āl-e-chashm-e-gunahgār kuchh nahīñ

ab ye khula ki ishq ka pindar kuchh nahin

diwar gir gai pas-e-diwar kuchh nahin

jis ne samajh liya tha mujhe aasaman par

ab jaanta hai wo mera kirdar kuchh nahin

KHud mujh ko e'timad nahin apni zat par

inkar mera kuchh nahin iqrar kuchh nahin

wo bhi samajh gaya ki hawas ka ye khel hai

ab madh-e-chashm-o-gesu-o-ruKHsar kuchh nahin

mizrab-e-gham ne aur bhi KHamosh kar diya

go khinch gaya hai saz ka har tar kuchh nahin

main bojh hun to phenk de ai kurra-e-zamin

kuchh aur tez ghum ye raftar kuchh nahin

dhundla gaya hai shisha-e-masumiyat 'KHayal'

ab infial-e-chashm-e-gunahgar kuchh nahin