abad ke tasht mein kuchh phul aur sitare liye

abad ke tasht meñ kuchh phuul aur sitāre liye

ye maiñ huuñ duur se aayā huā tumhāre liye

ajab thī un se mulāqāt par tapāk mirī

vo mere ḳhas-kade meñ aa ga.e sharāre liye

dayār-e-girya kī galiyoñ meñ aisī phislan hai

bashar guzarte haiñ dīvāroñ ke sahāre liye

bichhā ke in ko maiñ chāhe jidhar utar jā.ūñ

ravāñ huuñ naav meñ dariyā ke do kināre liye

bulandī se gire mazmūn kī tarah hai hayāt

luḌhaktī phirtī hai laġhzish ke isti.āre liye

hazār sub.h-e-safar nāshte kī mez pe thī

maiñ garm-e-sair huā nuur ke harāre liye

na jaane abr mirā kis taraf ravāna hai

siyāh raat ke parde meñ barq-pāre liye

ḳhudā se ḳhauf-zada itnā kar diyā gayā thā

ki ham ne saañs bhī duniyā meñ Dar ke maare liye

yahī thī shab jo zamīñ se ga.ī thī nam le kar

ab āsmāñ se chalī aa rahī hai taare liye

bahut sī ḳhud meñ tamāsīl jam.a kar lī haiñ

kuchh apne vāste kuchh ḳhaas kar tumhāre liye

maiñ DhūñD laayā kahīñ se kināya fardā kā

kahīñ se guzre hue vaqt ke ishāre liye

samā.a ke liye sargoshiyāñ uThā laayā

nazar ke vāste fitrat se kuchh nazāre liye

sab ek saath kahīñ lāpata hue 'shāhid'

buland karnī hai kis ne sadā hamāre liye

abad ke tasht mein kuchh phul aur sitare liye

ye main hun dur se aaya hua tumhaare liye

ajab thi un se mulaqat par tapak meri

wo mere KHas-kade mein aa gae sharare liye

dayar-e-girya ki galiyon mein aisi phislan hai

bashar guzarte hain diwaron ke sahaare liye

bichha ke in ko main chahe jidhar utar jaun

rawan hun naw mein dariya ke do kinare liye

bulandi se gire mazmun ki tarah hai hayat

luDhakti phirti hai laghzish ke istiare liye

hazar subh-e-safar nashte ki mez pe thi

main garm-e-sair hua nur ke harare liye

na jaane abr mera kis taraf rawana hai

siyah raat ke parde mein barq-pare liye

KHuda se KHauf-zada itna kar diya gaya tha

ki hum ne sans bhi duniya mein Dar ke mare liye

yahi thi shab jo zamin se gai thi nam le kar

ab aasman se chali aa rahi hai tare liye

bahut si KHud mein tamasil jama kar li hain

kuchh apne waste kuchh KHas kar tumhaare liye

main DhunD laya kahin se kinaya farda ka

kahin se guzre hue waqt ke ishaare liye

samaa ke liye sargoshiyan uTha laya

nazar ke waste fitrat se kuchh nazare liye

sab ek sath kahin lapata hue 'shahid'

buland karni hai kis ne sada hamare liye