abad se ta-ba-azal aks-e-na-tamam hain hum

abad se tā-ba-azal 'aks-e-nā-tamām haiñ ham

jahāñ ke ā.ina-ḳhāne se intiqām haiñ ham

agar ye naam na hotā to aur bhī hote

hai ek naam hamārā to sirf naam haiñ ham

hamāre chehre kī zardī na dekh aa.ina dekh

tujhe ḳhabar ho tirā rū-e-lāla-fām haiñ ham

namī milī to khulā jal rahe haiñ hoñTh apne

bujhī jo pyaas to samjhe ki tishna-kām haiñ ham

kisī ko jis kī koī ibtidā na mil paa.e

usī fasāna-e-hastī kā iḳhtitām haiñ ham

ham apnī maut se aage nikal chuke kab ke

burāq-e-'umr sivā tujh se barq-gām haiñ ham

bichhaḌne vaale bichhaḌte chale ga.e ham se

kisī ne ye bhī na sochā 'amīr-imām' haiñ ham

abad se ta-ba-azal 'aks-e-na-tamam hain hum

jahan ke aaina-KHane se intiqam hain hum

agar ye nam na hota to aur bhi hote

hai ek nam hamara to sirf nam hain hum

hamare chehre ki zardi na dekh aaina dekh

tujhe KHabar ho tera ru-e-lala-fam hain hum

nami mili to khula jal rahe hain honTh apne

bujhi jo pyas to samjhe ki tishna-kaam hain hum

kisi ko jis ki koi ibtida na mil pae

usi fasana-e-hasti ka iKHtitam hain hum

hum apni maut se aage nikal chuke kab ke

buraq-e-'umr siwa tujh se barq-gam hain hum

bichhaDne wale bichhaDte chale gae hum se

kisi ne ye bhi na socha 'amir-imam' hain hum