abas fikr-e-dawa mein hai pareshan chaaragar mera

abas fikr-e-davā meñ hai pareshāñ chārāgar merā

mirā sar jā.egā to jā.egā ye dard-e-sar merā

agar kuchh aarzū dil meñ mire hai to bas itnī hai

tire tīr-e-nazar kī nazr ho jaa.e jigar merā

tire paikān ko dil meñ jagah dī shauq se maiñ ne

kaleja tū ne dekhā ai but-e-bedād-gar merā

vo kahte haiñ ki zid hai ārzūoñ se tirī varna

na ho gar mudda.ā is meñ to dil terā hai ghar merā

maiñ vo āfat-talab huuñ rāt-din merī duā ye hai

ki sar jaa.e to jaa.e par na jaa.e dard-e-sar merā

zarā vo shoḳh ḳhanjar bāñdh kar maqtal meñ aa.e to

nirālā aaj hogā sab se mazmūn-e-kamar merā

idhar pahlū se uTh kar koī jaane par hai āmāda

huā jaatā hai ġham se haal idhar nau-e-digar merā

nikalvāyā gayā jis bazm se sau baar zillat se

vahīñ phir le chalā mujh ko dil-e-vahshat-asar merā

raqīboñ ke chalan ko yuuñ shikāyat sāmne mere

nahīñ hai merī jaañ is chaal se dil be-ḳhabar merā

miTā jaatā hai ab mehr-o-vafā kā naam aalam se

huā jaatā hai duniyā se koī dam meñ safar merā

tirā tīr-e-nazar dekhūñ tasallī kis kī kartā hai

idhar betāb dil merā udhar nālāñ jigar merā

vo un kā vaar ḳhanjar kā lagānā mujh pe tan tan kar

vo honā qatl-gah meñ shauq se sīna-sipar merā

chalāyā naaz se tīr-e-nazar jab us sitamgar ne

nishāna ban gayā kis shauq se 'nashtar' jigar merā

abas fikr-e-dawa mein hai pareshan chaaragar mera

mera sar jaega to jaega ye dard-e-sar mera

agar kuchh aarzu dil mein mere hai to bas itni hai

tere tir-e-nazar ki nazr ho jae jigar mera

tere paikan ko dil mein jagah di shauq se main ne

kaleja tu ne dekha ai but-e-bedad-gar mera

wo kahte hain ki zid hai aarzuon se teri warna

na ho gar muddaa is mein to dil tera hai ghar mera

main wo aafat-talab hun raat-din meri dua ye hai

ki sar jae to jae par na jae dard-e-sar mera

zara wo shoKH KHanjar bandh kar maqtal mein aae to

nirala aaj hoga sab se mazmun-e-kamar mera

idhar pahlu se uTh kar koi jaane par hai aamada

hua jata hai gham se haal idhar nau-e-digar mera

nikalwaya gaya jis bazm se sau bar zillat se

wahin phir le chala mujh ko dil-e-wahshat-asar mera

raqibon ke chalan ko yun shikayat samne mere

nahin hai meri jaan is chaal se dil be-KHabar mera

miTa jata hai ab mehr-o-wafa ka nam aalam se

hua jata hai duniya se koi dam mein safar mera

tera tir-e-nazar dekhun tasalli kis ki karta hai

idhar betab dil mera udhar nalan jigar mera

wo un ka war KHanjar ka lagana mujh pe tan tan kar

wo hona qatl-gah mein shauq se sina-sipar mera

chalaya naz se tir-e-nazar jab us sitamgar ne

nishana ban gaya kis shauq se 'nashtar' jigar mera