abhi abhi jo falak par se guzare gae

abhī abhī jo falak paar se guzāre ga.e

tumhārī aañkh se aise ka.ī sitāre ga.e

tumhāre hoñT se nikle har ek lafz kī ḳhair

ki jaise un pe gulāboñ ke phuul vaare ga.e

kisī ne niiñd meñ aa kar nahīñ chhuā ham ko

ye baal ḳhvāb meñ rah kar nahīñ sañvāre ga.e

pahal pahal to vo hoñToñ se dekhe jaate rahe

phir us ke baa'd mirī aañkh se pukāre ga.e

tire visāl kī ḳhvāhish kahīñ pe rakkhī ga.ī

tire visāl ke arse kahīñ guzāre ga.e

magar vo lahr hamārī taraf nahīñ palTī

agarche dhyān bahut us taraf hamāre ga.e

tumhāre jaane se kuchh ḳhaas to nahīñ huā bas

charāġh rakkhe ga.e aa.ine utāre ga.e

abhi abhi jo falak par se guzare gae

tumhaari aankh se aise kai sitare gae

tumhaare honT se nikle har ek lafz ki KHair

ki jaise un pe gulabon ke phul ware gae

kisi ne nind mein aa kar nahin chhua hum ko

ye baal KHwab mein rah kar nahin sanware gae

pahal pahal to wo honTon se dekhe jate rahe

phir us ke ba'd meri aankh se pukare gae

tere visal ki KHwahish kahin pe rakkhi gai

tere visal ke arse kahin guzare gae

magar wo lahr hamari taraf nahin palTi

agarche dhyan bahut us taraf hamare gae

tumhaare jaane se kuchh KHas to nahin hua bas

charagh rakkhe gae aaine utare gae