abhi hai mausam ghamon ka lekin main muskuraun to harj kya hai

abhī hai mausam ġhamoñ kā lekin maiñ muskurā.ūñ to harj kyā hai

ki nauha-ḳhvānī ke daur meñ ik ġhazal sunā.ūñ to harj kyā hai

dikhānā hai āftāb ko ye ki kaun hai merī shab kā sāthī

maiñ shaam hone se qabl hī ik diyā jalā.ūñ to harj kyā hai

hai diqqatoñ se bharā safar jab nahīñ hai koī bhī saath mere

to apne saa.e ko maiñ agar ham-safar banā.ūñ to harj kyā hai

lagī haiñ pābandiyāñ mulāqāt par ye sach hai ka.ī dinoñ se

magar maiñ rātoñ ko tere ḳhvāboñ meñ aa.uuñ jā.ūñ to harj kyā hai

zamāna pichhle zamāne ko yaad kar ke rahtā hai khoyā khoyā

magar maiñ agle dinoñ kī fikroñ meñ Duub jā.ūñ to harj kyā hai

farebī hai ye zamāna mujh ko hamesha detā rahā hai dhokā

agar maiñ ḳhud se hī aaj 'anjum' fareb khā.ūñ to harj kyā hai

abhi hai mausam ghamon ka lekin main muskuraun to harj kya hai

ki nauha-KHwani ke daur mein ek ghazal sunaun to harj kya hai

dikhana hai aaftab ko ye ki kaun hai meri shab ka sathi

main sham hone se qabl hi ek diya jalaun to harj kya hai

hai diqqaton se bhara safar jab nahin hai koi bhi sath mere

to apne sae ko main agar ham-safar banaun to harj kya hai

lagi hain pabandiyan mulaqat par ye sach hai kai dinon se

magar main raaton ko tere KHwabon mein aaun jaun to harj kya hai

zamana pichhle zamane ko yaad kar ke rahta hai khoya khoya

magar main agle dinon ki fikron mein Dub jaun to harj kya hai

farebi hai ye zamana mujh ko hamesha deta raha hai dhoka

agar main KHud se hi aaj 'anjum' fareb khaun to harj kya hai