abhi na jao abhi raste saje bhi nahin

abhī na jaao abhī rāste saje bhī nahīñ

abhī charāġh sar-e-kahkashāñ jale bhī nahīñ

jabīn-e-charḳh pe gulgūna-e-shafaq mal kar

abhī to shaam ke saa.e kahīñ ga.e bhī nahīñ

abhī abhī to jamā.ī hai maiñ ne bazm-e-ḳhayāl

abhī ufuq-ba-ufuq bām-o-dar saje bhī nahīñ

urūs-e-shab ne abhī chāñdnī utārī hai

abhī to gesū-e-shab Thiik se khule bhī nahīñ

abhī se tark-e-ta.alluq ke mashvare to na do

abhī to yādoñ ke saare diye bujhe bhī nahīñ

mire safar meñ sitāre the bas sharīk-e-safar

ye rāh-rau to mirī rah-guzar ke the bhī nahīñ

abhi na jao abhi raste saje bhi nahin

abhi charagh sar-e-kahkashan jale bhi nahin

jabin-e-charKH pe gulguna-e-shafaq mal kar

abhi to sham ke sae kahin gae bhi nahin

abhi abhi to jamai hai main ne bazm-e-KHayal

abhi ufuq-ba-ufuq baam-o-dar saje bhi nahin

urus-e-shab ne abhi chandni utari hai

abhi to gesu-e-shab Thik se khule bhi nahin

abhi se tark-e-talluq ke mashware to na do

abhi to yaadon ke sare diye bujhe bhi nahin

mere safar mein sitare the bas sharik-e-safar

ye rah-rau to meri rah-guzar ke the bhi nahin