abhi na kijiye zahmat naqab uThane ki

abhī na kījiye zahmat naqāb uThāne kī

nazar meñ taab nahīñ hai nazar milāne kī

hamāre haath meñ bas ik tumhārā dāman hai

tumhāre haath meñ taqdīr hai zamāne kī

hamāre pahle tumheñ kaun sar jhukātā thā

hamīñ ne rasm nikālī hai sar jhukāne kī

hujūm-e-barq bhī aa kar qarīb lauT ga.ī

kamāl kar ga.ī taqdīr āshiyāne kī

chaman meñ apne nasheman kī zindagī kitnī

rakhī hai barq pe buniyād āshiyāne kī

nigāh-e-nāz vahāñ aasrā diyā tū ne

jahāñ umiid thī kashtī ke Duub jaane kī

chamak hī jāoge duniyā meñ ek din 'nayyar'

ġhulāmī karte raho un ke āstāne kī

abhi na kijiye zahmat naqab uThane ki

nazar mein tab nahin hai nazar milane ki

hamare hath mein bas ek tumhaara daman hai

tumhaare hath mein taqdir hai zamane ki

hamare pahle tumhein kaun sar jhukata tha

hamin ne rasm nikali hai sar jhukane ki

hujum-e-barq bhi aa kar qarib lauT gai

kamal kar gai taqdir aashiyane ki

chaman mein apne nasheman ki zindagi kitni

rakhi hai barq pe buniyaad aashiyane ki

nigah-e-naz wahan aasra diya tu ne

jahan umid thi kashti ke Dub jaane ki

chamak hi jaoge duniya mein ek din 'nayyar'

ghulami karte raho un ke aastane ki