abhi raushan hui hain mere ghar ki battiyan mujhse

abhī raushan huī haiñ mere ghar kī battiyāñ mujh se

havā phir le na jaa.e chhīn kar parchhā.iyāñ mujh se

karūñ āñkhoñ se nam miTTī ḳhalāoñ phuul raste meñ

taqāzā kar rahī haiñ ḳhvāhishoñ kī bastiyāñ mujh se

ye roz-o-shab ke hañgāme dar-o-dīvār ke andar

batā.ūñ kyā sulajhtī hī nahīñ ab gutthiyāñ mujh se

kisī se muskurā kar baat kar letā huuñ maiñ jab bhī

na jaane kyoñ ḳhafā rahtī haiñ terī khiḌkiyāñ mujh se

ye tanhā.ī kā mausam bhī dabe paañv guzar jaatā

agar yādeñ kisī kī baañT letīñ talḳhiyāñ mujh se

vo barfīle badan ke saath milne jab bhī aatā hai

churā letā hai mere ḳhuun kī sab garmiyāñ mujh se

parinda ek din uḌ jā.egā TūTegī Tahnī bhī

yahī kahtī haiñ phūloñ kī bikhartī patiyāñ mujh se

akelā maiñ jo ghar lauTā to phir kaise batā.ūñgā

ḳhudā.ī kā sabab pūchheñgī jab tanhā.iyāñ mujh se

abhi raushan hui hain mere ghar ki battiyan mujh se

hawa phir le na jae chhin kar parchhaiyan mujh se

karun aankhon se nam miTTi KHalaon phul raste mein

taqaza kar rahi hain KHwahishon ki bastiyan mujh se

ye roz-o-shab ke hangame dar-o-diwar ke andar

bataun kya sulajhti hi nahin ab gutthiyan mujh se

kisi se muskura kar baat kar leta hun main jab bhi

na jaane kyon KHafa rahti hain teri khiDkiyan mujh se

ye tanhai ka mausam bhi dabe panw guzar jata

agar yaaden kisi ki banT letin talKHiyan mujh se

wo barfile badan ke sath milne jab bhi aata hai

chura leta hai mere KHun ki sab garmiyan mujh se

parinda ek din uD jaega TuTegi Tahni bhi

yahi kahti hain phulon ki bikharti patiyan mujh se

akela main jo ghar lauTa to phir kaise bataunga

KHudai ka sabab puchhengi jab tanhaiyan mujh se