abhi ruswaiyon ka ek baDa bazar aaega

abhī rusvā.iyoñ kā ik baḌā bāzār aa.egā

phir is ke baad hī vo kūcha-e-dildār aa.egā

vatan kī ek tasvīr ḳhayālī sab banāte haiñ

ḳhabar lekin nahīñ kyā is meñ kū-e-yār aa.egā

gul-e-shāḳh-e-mohabbat par lahū kā rañg khiltā hai

ki ab rañg-e-hinā zikr-e-lab-o-ruḳhsār aa.egā

hamāre vāste bhī sā.at-e-hamvār Thahregī

ki rāh-e-shauq meñ jis dam vo nā-hamvār aa.egā

abhī āb-o-havā-e-jism ke asrār khulte haiñ

abhī vo toḌne is jism kī dīvār aa.egā

karo ahl-e-junūñ kuchh to karo sāmān-e-dildārī

ki shahr-e-ishq meñ vo shoḳh pahlī baar aa.egā

abhi ruswaiyon ka ek baDa bazar aaega

phir is ke baad hi wo kucha-e-dildar aaega

watan ki ek taswir KHayali sab banate hain

KHabar lekin nahin kya is mein ku-e-yar aaega

gul-e-shaKH-e-mohabbat par lahu ka rang khilta hai

ki ab rang-e-hina zikr-e-lab-o-ruKHsar aaega

hamare waste bhi saat-e-hamwar Thahregi

ki rah-e-shauq mein jis dam wo na-hamwar aaega

abhi aab-o-hawa-e-jism ke asrar khulte hain

abhi wo toDne is jism ki diwar aaega

karo ahl-e-junun kuchh to karo saman-e-dildari

ki shahr-e-ishq mein wo shoKH pahli bar aaega