abhi se naqsh-e-hairat ban gae kya dekhne wale

abhī se naqsh-e-hairat ban ga.e kyā dekhne vaale

tajallī chāhne vaale tamāshā dekhne vaale

nahīñ kam josh-e-vahshat kā tamāshā dekhne vaale

junūñ to ḳhud hī kar letā hai paidā dekhne vaale

lihāz-e-tāb-e-dil ai be-mahābā dekhne vaale

pashemāñ bhī hue haiñ un kā jalva dekhne vaale

sadā-e-lan-tarānī ab salā-e-manyarānī hai

kareñ tāb-e-dil-o-dīda muhayyā dekhne vaale

dil-e-nazzāra jo sadqe tirī shān-e-tajallī par

ba-har-sūrat haiñ mahrūm-e-tamāshā dekhne vaale

abas hai dīda-o-dil ko gila be-iltifātī kā

abhī haiñ nā-shanās-e-ramz-o-īmā dekhne vaale

'rashīd' āḳhir karūñ kis kis se sharh-e-ibtilā-e-dil

na kar luuñ jam.a kyoñ misl-e-zuleḳhā dekhne vaale

abhi se naqsh-e-hairat ban gae kya dekhne wale

tajalli chahne wale tamasha dekhne wale

nahin kam josh-e-wahshat ka tamasha dekhne wale

junun to KHud hi kar leta hai paida dekhne wale

lihaz-e-tab-e-dil ai be-mahaba dekhne wale

pasheman bhi hue hain un ka jalwa dekhne wale

sada-e-lan-tarani ab sala-e-manyarani hai

karen tab-e-dil-o-dida muhayya dekhne wale

dil-e-nazzara jo sadqe teri shan-e-tajalli par

ba-har-surat hain mahrum-e-tamasha dekhne wale

abas hai dida-o-dil ko gila be-iltifati ka

abhi hain na-shanas-e-ramz-o-ima dekhne wale

'rashid' aaKHir karun kis kis se sharh-e-ibtila-e-dil

na kar lun jama kyon misl-e-zuleKHa dekhne wale