abhi tak usko mera intizar hai shayad

abhī tak us ko mirā intizār hai shāyad

mirī nazar pe bahut e'tibār hai shāyad

libās aisā maiñ pahle kabhī nahīñ dekhā

kisī ke sog meñ ab ke bahār hai shāyad

vo dekh kar mujhe misl-e-gulāb khiltā hai

ki dil hī dil meñ use mujh se pyaar hai shāyad

ka.ī diloñ kā muqaddar 'azāb hotā hai

hamārā dil bhī unhīñ meñ shumār hai shāyad

nigāh-e-nāz kā nashsha kabhī kā TuuT chukā

bas ab to āñkhoñ meñ us kā ḳhumār hai shāyad

vo baat baat pe apnī misāl detā hai

kuchh apne aap pe kam e'tibār hai shāyad

tane pe jis ke tarāshe the ham ne naam kabhī

'ḳhayāl' kiije yahī vo chinār hai shāyad

abhi tak us ko mera intizar hai shayad

meri nazar pe bahut e'tibar hai shayad

libas aisa main pahle kabhi nahin dekha

kisi ke sog mein ab ke bahaar hai shayad

wo dekh kar mujhe misl-e-gulab khilta hai

ki dil hi dil mein use mujh se pyar hai shayad

kai dilon ka muqaddar 'azab hota hai

hamara dil bhi unhin mein shumar hai shayad

nigah-e-naz ka nashsha kabhi ka TuT chuka

bas ab to aankhon mein us ka KHumar hai shayad

wo baat baat pe apni misal deta hai

kuchh apne aap pe kam e'tibar hai shayad

tane pe jis ke tarashe the hum ne nam kabhi

'KHayal' kije yahi wo chinar hai shayad