abhi to aankhon mein na-dida KHwab baqi hain

abhī to āñkhoñ meñ nā-dīda ḳhvāb baaqī haiñ

jo vaqt likh nahīñ paayā vo baab baaqī haiñ

sazā jo agle sahīfoñ meñ thī tamām huī

magar sahīfa-e-dil ke azaab baaqī haiñ

karoge jamā bhalā kaise dil ke shīshoñ ko

abhī to dasht-e-falak meñ shahāb baaqī haiñ

uḌā ke le ga.ī āñdhī vo harf harf kitāb

jo saf.ha saf.ha haiñ dil ke sarāb baaqī haiñ

jo giilī ret pe tūfāñ bane guzar bhī ga.e

vo bhīgī palkoñ meñ ab tak sahāb baaqī haiñ

vahī to vaqt kī be-chehragī hai apnī shanāḳht

ki jis pe ab bhī hazāroñ naqāb baaqī haiñ

lahū ke phuul ḳhizāñ āshnā nahīñ 'tanvīr'

ki dasht dasht shafaq ke gulāb baaqī haiñ

abhi to aankhon mein na-dida KHwab baqi hain

jo waqt likh nahin paya wo bab baqi hain

saza jo agle sahifon mein thi tamam hui

magar sahifa-e-dil ke azab baqi hain

karoge jama bhala kaise dil ke shishon ko

abhi to dasht-e-falak mein shahab baqi hain

uDa ke le gai aandhi wo harf harf kitab

jo safha safha hain dil ke sarab baqi hain

jo gili ret pe tufan bane guzar bhi gae

wo bhigi palkon mein ab tak sahab baqi hain

wahi to waqt ki be-chehragi hai apni shanaKHt

ki jis pe ab bhi hazaron naqab baqi hain

lahu ke phul KHizan aashna nahin 'tanwir'

ki dasht dasht shafaq ke gulab baqi hain