abhi to mahw-e-tajalli hain sab dukanon par

abhī to mahv-e-tajallī haiñ sab dukānoñ par

palaT ke dekhiye aate haiñ kab makānoñ par

ḳhayāl-e-ḳhām meñ guzrī hai zindagī saarī

haqīqatoñ kā gumāñ hai abhī fasānoñ par

qadam qadam pe tazādoñ se sābiqa hai jahāñ

yaqīn kaise kare koī in gumānoñ par

vo jis kī chaah meñ mar mar ke jī rahe haiñ yahāñ

na jaane kaun sī bastī hai āsmānoñ par

jahāñ bhī tiir lagā bas vahī hadaf Thahrā

hai phir bhī zo.am bahut un ko in kamānoñ par

maiñ un kī baat ko kis taur mo'atabar jānūñ

madār-e-zīst hī jin kā hai kuchh bahānoñ par

kaḌī hai dhuup jhulastī haiñ ab dalīleñ sabhī

yaqīñ hai phir bhī unheñ kitnā sā.ebānoñ par

nazar meñ zehn meñ dil meñ kushādgī laao

havā ke ruḳh kā taqāzā hai bādbānoñ par

na jaane kitnī hī sadiyāñ lageñgī aur abhī

diloñ kī baat jab aa pā.egī zabānoñ par

ajiib un ko salīqa hai khul ke jiine kā

na.ī hai kaun sī tohmat ye ham divānoñ par

hamārī zaat se ābād kuchh ḳharābe haiñ

hai apne dam se ujālā ka.ī maqāmoñ par

ḳhirad-navāz junūñ aur junūñ-navāz ḳhirad

haiñ ab bhī nuur tarīqe ye kuchh Thikānoñ par

use jagāo Dase tum ko maar Daale tumheñ

tumhārī zaat meñ baiThā hai jo ḳhazānoñ par

abhi to mahw-e-tajalli hain sab dukanon par

palaT ke dekhiye aate hain kab makanon par

KHayal-e-KHam mein guzri hai zindagi sari

haqiqaton ka guman hai abhi fasanon par

qadam qadam pe tazadon se sabiqa hai jahan

yaqin kaise kare koi in gumanon par

wo jis ki chah mein mar mar ke ji rahe hain yahan

na jaane kaun si basti hai aasmanon par

jahan bhi tir laga bas wahi hadaf Thahra

hai phir bhi zoam bahut un ko in kamanon par

main un ki baat ko kis taur mo'atabar jaanun

madar-e-zist hi jin ka hai kuchh bahanon par

kaDi hai dhup jhulasti hain ab dalilen sabhi

yaqin hai phir bhi unhen kitna saebanon par

nazar mein zehn mein dil mein kushadgi lao

hawa ke ruKH ka taqaza hai baadbanon par

na jaane kitni hi sadiyan lagengi aur abhi

dilon ki baat jab aa paegi zabanon par

ajib un ko saliqa hai khul ke jine ka

nai hai kaun si tohmat ye hum diwanon par

hamari zat se aabaad kuchh KHarabe hain

hai apne dam se ujala kai maqamon par

KHirad-nawaz junun aur junun-nawaz KHirad

hain ab bhi nur tariqe ye kuchh Thikanon par

use jagao Dase tum ko mar Dale tumhein

tumhaari zat mein baiTha hai jo KHazanon par