abhi to waqt baqi hai ishaara ho bhi sakta hai

abhī to vaqt baaqī hai ishāra ho bhī saktā hai

tumhāre paas jo kuchh hai hamārā ho bhī saktā hai

amīr-e-shahr se achchhā hai thoḌā fāsla varna

ba-nām-e-dostī dushman hamārā ho bhī saktā hai

na jaane kaun sā lamha kisī kī yaad aa jaa.e

ye aisā hādisa hai jo dubāra ho bhī saktā hai

kisī lamhe bharosa TuuT saktā hai mohabbat se

kisī lamhe haqīqat āshkāra ho bhī saktā hai

na jaane kab dayār-e-shauq kā mausam badal jaa.e

jo ik mauhūm nuqta hai sitāra ho bhī saktā hai

muḳhātab kī adā-e-nāz qātil ho bhī saktī hai

mohabbat kī tijārat meñ ḳhasāra ho bhī saktā hai

nujūmī kī kahī har baat sachchī ho nahīñ saktī

magar kuchh baat kī jānib ishāra ho bhī saktā hai

abhi to waqt baqi hai ishaara ho bhi sakta hai

tumhaare pas jo kuchh hai hamara ho bhi sakta hai

amir-e-shahr se achchha hai thoDa fasla warna

ba-nam-e-dosti dushman hamara ho bhi sakta hai

na jaane kaun sa lamha kisi ki yaad aa jae

ye aisa hadisa hai jo dubara ho bhi sakta hai

kisi lamhe bharosa TuT sakta hai mohabbat se

kisi lamhe haqiqat aashkara ho bhi sakta hai

na jaane kab dayar-e-shauq ka mausam badal jae

jo ek mauhum nuqta hai sitara ho bhi sakta hai

muKHatab ki ada-e-naz qatil ho bhi sakti hai

mohabbat ki tijarat mein KHasara ho bhi sakta hai

nujumi ki kahi har baat sachchi ho nahin sakti

magar kuchh baat ki jaanib ishaara ho bhi sakta hai