abhi ya-rab bahut kuchh wusaten hain mere daman mein

abhī yā-rab bahut kuchh vus.ateñ haiñ mere dāmāñ meñ

chaman kā kāñTā kāñTā khiñch ke aa jaa.e bayābāñ meñ

mire maz.hab pe rashk-afroziyāñ haiñ kufr-o-īmāñ meñ

ilāhī kyā kashish rakh dī jabīn-e-ijz-sāmāñ meñ

kahāñ tak hogā ālamgīr ye vahshat kā hangāma

ye kaisī vus.ateñ haiñ kūcha-e-chāk-e-garebāñ meñ

tahī sāġhar nazar aaya na koī is ḳharābe meñ

sadā-e-rashk be-mafhum sī hai bazm-e-hirmāñ meñ

zarā us kī haqīqat par bhī bahs-ārā.iyāñ vaa.iz

jise ik jaam ne pahuñchā diyā hai bazm-e-irfāñ meñ

mohabbat ne idhar dil ko gudāz-e-ārzū baḳhshā

udhar kuchh bijliyāñ bhar diiñ nigāh-e-tūr-sāmāñ meñ

zarā ai hairat-e-jalva mire dil ko liye rahnā

naqāb ulTe hue haiñ vo tajallī-gāh-e-irfāñ meñ

azal se dast-e-gul-chīñ kā na dekhā jis ne saaya bhī

maiñ aisī ik chaman-bandī kā hāsil huuñ gulistāñ meñ

gulistāñ raqs kyoñ kartā mirī rangīñ-navā.ī par

na hotī mā'rifat 'bāsit' jo tab.a-e-sher-sāmāñ meñ

abhi ya-rab bahut kuchh wusaten hain mere daman mein

chaman ka kanTa kanTa khinch ke aa jae bayaban mein

mere mazhab pe rashk-afroziyan hain kufr-o-iman mein

ilahi kya kashish rakh di jabin-e-ijz-saman mein

kahan tak hoga aalamgir ye wahshat ka hangama

ye kaisi wusaten hain kucha-e-chaak-e-gareban mein

tahi saghar nazar aaya na koi is KHarabe mein

sada-e-rashk be-mafhum si hai bazm-e-hirman mein

zara us ki haqiqat par bhi bahs-araiyan waiz

jise ek jam ne pahuncha diya hai bazm-e-irfan mein

mohabbat ne idhar dil ko gudaz-e-arzu baKHsha

udhar kuchh bijliyan bhar din nigah-e-tur-saman mein

zara ai hairat-e-jalwa mere dil ko liye rahna

naqab ulTe hue hain wo tajalli-gah-e-irfan mein

azal se dast-e-gul-chin ka na dekha jis ne saya bhi

main aisi ek chaman-bandi ka hasil hun gulistan mein

gulistan raqs kyon karta meri rangin-nawai par

na hoti ma'rifat 'basit' jo taba-e-sher-saman mein