abr aaya hai KHumar aaya hai

abr aaya hai ḳhumār aaya hai

chehra-e-gul pe nikhār aaya hai

jab kahīñ zikr-e-bahār aaya hai

jhūmtā bāda-gusār aaya hai

sar-ba-kaf aaj ġhazāl aate haiñ

kaun yaañ bahr-e-shikār aaya hai

na milā mahmil-e-lailā kā surāġh

qais har samt pukār aaya hai

auj par hai dil-e-nādāñ kā nasīb

us pe aaj un ko bhī pyaar aaya hai

kah rahe haiñ vo ḳhudā ḳhair kare

ham pe to hotā nisār aaya hai

jab shagūfa koī gulshan meñ khilā

sāmne jalva-e-yār aaya hai

luTā sabr aur sukūñ phir 'nazmī'

jab zarā dil ko qarār aaya hai

abr aaya hai KHumar aaya hai

chehra-e-gul pe nikhaar aaya hai

jab kahin zikr-e-bahaar aaya hai

jhumta baada-gusar aaya hai

sar-ba-kaf aaj ghazal aate hain

kaun yan bahr-e-shikar aaya hai

na mila mahmil-e-laila ka suragh

qais har samt pukar aaya hai

auj par hai dil-e-nadan ka nasib

us pe aaj un ko bhi pyar aaya hai

kah rahe hain wo KHuda KHair kare

hum pe to hota nisar aaya hai

jab shagufa koi gulshan mein khila

samne jalwa-e-yar aaya hai

luTa sabr aur sukun phir 'nazmi'

jab zara dil ko qarar aaya hai