abr hun dhup hun sahra hun samundar hun main

abr huuñ dhuup huuñ sahrā huuñ samundar huuñ maiñ

muḳhtalif ruup haiñ mere ki suḳhanvar huuñ maiñ

dhuup niklegī to un kā bhī bharam TūTegā

jin kī nazroñ meñ abhī mom kā paikar huuñ maiñ

kisī dāman ke muqaddar ko jagāne ke liye

vaqt kī palkoñ pe Thahrā huā gauhar huuñ maiñ

tū jo chhū le to ḳhad-o-ḳhāl numāyāñ ho jaa.eñ

varna dhuñdlāyā huā ḳhvāb sā manzar huuñ maiñ

dekhnā jab kisī me'mār ke haath ā.uñgā

aaj dīvār se ukhḌā huā patthar huuñ maiñ

ḳhud-shanāsoñ ne abhī mujh ko khañgālā hī nahīñ

varna har rang-e-talātum kā shanāvar huuñ maiñ

jis pe tahrīr bhī taqrīr bhī nāzāñ hai 'nazīr'

aisā shahbāz-e-qalam aisā suḳhanvar huuñ maiñ

abr hun dhup hun sahra hun samundar hun main

muKHtalif rup hain mere ki suKHanwar hun main

dhup niklegi to un ka bhi bharam TuTega

jin ki nazron mein abhi mom ka paikar hun main

kisi daman ke muqaddar ko jagane ke liye

waqt ki palkon pe Thahra hua gauhar hun main

tu jo chhu le to KHad-o-KHal numayan ho jaen

warna dhundlaya hua KHwab sa manzar hun main

dekhna jab kisi me'mar ke hath aaunga

aaj diwar se ukhDa hua patthar hun main

KHud-shanason ne abhi mujh ko khangala hi nahin

warna har rang-e-talatum ka shanawar hun main

jis pe tahrir bhi taqrir bhi nazan hai 'nazir'

aisa shahbaz-e-qalam aisa suKHanwar hun main