abr ka mahtab ka bhi tha

abr kā māhtāb kā bhī thā

ik zamāna sharāb kā bhī thā

kuchh tabī.at bhī apnī maa.il thī

kuchh jhamelā shabāb kā bhī thā

rāt-bhar terī chāñdnī aur din

yaad ke āftāb kā bhī thā

terī shohrat ke ḳhaas rañgoñ meñ

ik mire intiḳhāb kā bhī thā

chāñdnī meñ tire badan kā nikhār

husn kuchh māhtāb kā bhī thā

mausam-e-vasl terī zulfoñ meñ

āstāna gulāb kā bhī thā

kuchh mire shauq kī tajallī thī

kuchh saraknā naqāb kā bhī thā

tund lahroñ se kyā shikāyat ho

jism nāzuk habāb kā bhī thā

umr zindān-e-jabr meñ guzrī

aur abhī din hisāb kā bhī thā

kuchh tirā intizār thā aur kuchh

mai-e-gul rañg-o-nāb kā bhī thā

ye sazā-o-jazā kī baat na thī

Dar savāl-o-javāb kā bhī thā

tum agar DhūñDte tah-e-dil tak

rāsta inqalāb kā bhī thā

jis meñ tum bas ga.e kabhī vo ghar

dil-e-ḳhāna-ḳharāb kā bhī thā

ham to Thahre kashīda-sar lekin

hukm-e-hākim itaab kā bhī thā

vaqt ke chor-ā.ine meñ 'munīr'

aks chashm-e-pur-āb kā bhī thā

abr ka mahtab ka bhi tha

ek zamana sharab ka bhi tha

kuchh tabiat bhi apni mail thi

kuchh jhamela shabab ka bhi tha

raat-bhar teri chandni aur din

yaad ke aaftab ka bhi tha

teri shohrat ke KHas rangon mein

ek mere intiKHab ka bhi tha

chandni mein tere badan ka nikhaar

husn kuchh mahtab ka bhi tha

mausam-e-wasl teri zulfon mein

aastana gulab ka bhi tha

kuchh mere shauq ki tajalli thi

kuchh sarakna naqab ka bhi tha

tund lahron se kya shikayat ho

jism nazuk habab ka bhi tha

umr zindan-e-jabr mein guzri

aur abhi din hisab ka bhi tha

kuchh tera intizar tha aur kuchh

mai-e-gul rang-o-nab ka bhi tha

ye saza-o-jaza ki baat na thi

Dar sawal-o-jawab ka bhi tha

tum agar DhunDte tah-e-dil tak

rasta inqalab ka bhi tha

jis mein tum bas gae kabhi wo ghar

dil-e-KHana-KHarab ka bhi tha

hum to Thahre kashida-sar lekin

hukm-e-hakim itab ka bhi tha

waqt ke chor-aine mein 'munir'

aks chashm-e-pur-ab ka bhi tha