abr likhti hai kahin aur ghaTa likhti hai

abr likhtī hai kahīñ aur ghaTā likhtī hai

roz ik zaḳhm mire naam havā likhtī hai

zard pattoñ kī chamaktī huī peshānī par

hai koī naam jise bād-e-sabā likhtī hai

jo mire naam se mansūb nahīñ hai lekin

vo fasāna bhī mirā ḳhalq-e-ḳhudā likhtī hai

ai mirī jaan mohabbat bhī ajab shai hai ki jo

kūcha-e-gard-e-malāmat ko vafā likhtī hai

sun kisī TuuTe hue dil kā vo nauha to nahīñ

naġhma-e-gul ki jise dast-e-sabā likhtī hai

ik tamannā ke liye phirtī hai sahrā sahrā

zindagī roz koī ḳhvāb nayā likhtī hai

shab ke sannāTe meñ ik maañ kī chhalaktī huī aañkh

apne pyāroñ ke liye harf-e-duā likhtī hai

'shāhid' us ko maiñ sunātā huuñ purānī ġhazleñ

vo mire naam se kuchh sher nayā likhtī hai

abr likhti hai kahin aur ghaTa likhti hai

roz ek zaKHm mere nam hawa likhti hai

zard patton ki chamakti hui peshani par

hai koi nam jise baad-e-saba likhti hai

jo mere nam se mansub nahin hai lekin

wo fasana bhi mera KHalq-e-KHuda likhti hai

ai meri jaan mohabbat bhi ajab shai hai ki jo

kucha-e-gard-e-malamat ko wafa likhti hai

sun kisi TuTe hue dil ka wo nauha to nahin

naghma-e-gul ki jise dast-e-saba likhti hai

ek tamanna ke liye phirti hai sahra sahra

zindagi roz koi KHwab naya likhti hai

shab ke sannaTe mein ek man ki chhalakti hui aankh

apne pyaron ke liye harf-e-dua likhti hai

'shahid' us ko main sunata hun purani ghazlen

wo mere nam se kuchh sher naya likhti hai