abr-para hun koi dam mein chala jaunga

abr-pāra huuñ koī dam meñ chalā jā.ūñgā

naqsh-bar-āb huuñ lahroñ meñ samā jā.ūñgā

dhaar par apne ta.aqqul ko chaḌhā jā.ūñgā

rasm-e-āzādī-e-afkār uThā jā.ūñgā

ye aqā.ed haiñ chhalāve unheñ ifshā kar de

ma.anī-e-sīmiyā duniyā ko batā jā.ūñgā

sar meñ saudoñ ke bunā kartā huuñ taane baane

ahl-e-tadbīr ko chakkar meñ phañsā jā.ūñgā

kaise tarsīl karūñ sāma-e-yārāñ tak

shahr-āshob parindoñ kā sunā jā.ūñgā

muñh ko be-rūh kitāboñ se basīrat na milī

shahr se jaate hue sab ko jalā jā.ūñgā

abr-para hun koi dam mein chala jaunga

naqsh-bar-ab hun lahron mein sama jaunga

dhaar par apne taqqul ko chaDha jaunga

rasm-e-azadi-e-afkar uTha jaunga

ye aqaed hain chhalawe unhen ifsha kar de

mani-e-simiya duniya ko bata jaunga

sar mein saudon ke buna karta hun tane bane

ahl-e-tadbir ko chakkar mein phansa jaunga

kaise tarsil karun sama-e-yaran tak

shahr-ashob parindon ka suna jaunga

munh ko be-ruh kitabon se basirat na mili

shahr se jate hue sab ko jala jaunga