abr viran jazire pe jhukta hua chand taron pe zulfen giraate hue

abr vīrāñ jazīre pe jhuktā huā chāñd tāroñ pe zulfeñ girāte hue

ghaaT par ek kashtī thī TuuTī huī pāniyoñ par kañval sarsarāte hue

chāñd imshab dabe paañv chaltā huā zard ashjār kī shāḳh par aa.egā

jal-parī jhaT se paanī meñ chhup jā.egī safha-e-āb par dil banāte hue

sārbānoñ ke uThte qadam ruk ga.e ik tamannā kī hiddat se dil jal uThā

dasht-e-ehsās meñ aag sī lag ga.ī muḌ ga.ī ūñTnī bilbilāte hue

būḌhā bargad ki jis kī jhukī shāḳh par kitnī nasloñ se haiñ kuchh parindoñ ke ghar

roz gintā huuñ us kī jatāoñ ke bal ghar ko aate hue ghar se jaate hue

Dūbne ke irāde se aayā magar der tak pāniyoñ ko hī taktā rahā

sāhiloñ kī havā jaane kyā kah ga.ī kaan meñ chal diyā muskurāte hue

raat mahkī huī chāñdnī ko liye āftābī qabīle ke ghar aa.ī thī

zard ḳhemoñ ke atrāf pakḌī ga.ī chobdāroñ se dāman chhuḌāte hue

shahr ke paar jangal kī dahlīz par chand ḳhūnī balāoñ kā asthān hai

ḳhushk tālāb par jo bhī aa ke rukā aa liyā tiir ne sansanāte hue

abr viran jazire pe jhukta hua chand taron pe zulfen giraate hue

ghaT par ek kashti thi TuTi hui paniyon par kanwal sarsaraate hue

chand imshab dabe panw chalta hua zard ashjar ki shaKH par aaega

jal-pari jhaT se pani mein chhup jaegi safha-e-ab par dil banate hue

sarbanon ke uThte qadam ruk gae ek tamanna ki hiddat se dil jal uTha

dasht-e-ehsas mein aag si lag gai muD gai unTni bilbilate hue

buDha bargad ki jis ki jhuki shaKH par kitni naslon se hain kuchh parindon ke ghar

roz ginta hun us ki jataon ke bal ghar ko aate hue ghar se jate hue

Dubne ke irade se aaya magar der tak paniyon ko hi takta raha

sahilon ki hawa jaane kya kah gai kan mein chal diya muskuraate hue

raat mahki hui chandni ko liye aaftabi qabile ke ghar aai thi

zard KHemon ke atraf pakDi gai chobdaron se daman chhuDate hue

shahr ke par jangal ki dahliz par chand KHuni balaon ka asthan hai

KHushk talab par jo bhi aa ke ruka aa liya tir ne sansanate hue